9 чэрвеня, Мінск /Кар. БЕЛТА/. Беларускі велагоншчык Яўген Каралёк стаў пераможцам пралога на шматдзёнцы "Пяць кольцаў Масквы", паведамляе карэспандэнт БЕЛТА.
На папярэднім этапе шматдзёнкі спартсмены спаборнічалі ў індывідуальнай гонцы на час. Дыстанцыю 3,8 км Каралёк, які прадстаўляе веласіпедны клуб "Мінск", пераадолеў за 4 мін. 35 сек., усяго на паўсекунды апярэдзіўшы расіяніна Аляксандра Еўтушэнку. У дзясятку мацнейшых трапіў яшчэ адзін прадстаўнік Беларусі Браніслаў Самойлаў, які заняў 7-е месца. Усяго на старт гонкі выйшлі 123 веласіпедысты.
Шматдзёнка "Пяць кольцаў Масквы" прадоўжыцца сёння этапам у паселішчы Клёнаўскае. Далей спартсменаў чакаюць дзве гонкі ў Крылацкім і этап на Вараб'ёвых гарах. У спаборніцтвах прымаюць удзел 28 беларусаў з пяці каманд: "Мінск", "Велабайкі", "Viva Ровар", велаклуба "Белаз" і зборнай Беларусі.-0-
