27 красавіка, Мінск /Кар. БЕЛТА/. Беларускі тэнісіст Ягор Герасімаў прабіўся ў 1/8 фіналу турніру ў нямецкім Мюнхене з прызавым фондам 534,5 тыс. еўра, паведамляе карэспандэнт БЕЛТА.
У сённяшняй гульні 1/16 фіналу беларус, які займае 150-е месца ў сусветным рэйтынгу, перамог аўстралійскага тэнісіста Джона Мілмана, у якога 79-я пазіцыя ў рэйтынгу АТР, - 4:6, 6:2, 6:2. Паядынак доўжыўся 2 гадзіны 15 мінут.
У матчы 1/8 фіналу сапернікам Ягора Герасімава будзе нідэрландзец Боцік Ван дэ Зандсхюлп (40-ы нумар рэйтынгу АТР). Герасімаў прабіўся ў асноўную сетку гэтых спаборніцтваў праз кваліфікацыю, перамогшы аргенцінца Франсіска Чэрундола і бразільца Цьяга Мантэйра.
Учора яшчэ адзін беларус Ілья Івашка (44) у 1/16 фіналу перамог у трохсэтавым паядынку амерыканскага тэнісіста Маккензі Макдональда (51) - 6:4, 3:6, 6:3. Сёння ў матчы за выхад у чвэрцьфінал Івашка сустрэнецца з грузінскім тэнісістам Нікалазам Басілашвілі (20).
Заўтра вядучыя беларускія тэнісісткі прымуць старт у турніры катэгорыі WTA-1000 у Мадрыдзе з прызавым фондам $6,5 млн. Чацвёртая ракетка планеты Арына Сабаленка ў 1/32 фіналу згуляе з амерыканскай тэнісісткай Амандай Анісімавай (33). Вікторыя Азаранка (17) будзе сапернічаць з прадстаўніцай Швейцарыі Вікторыяй Галубіч (39). Яшчэ адна беларуска Аляксандра Сасновіч (50) не змагла прабіцца ў асноўную сетку спаборніцтваў у іспанскай сталіцы, уступіўшы ў першым кваліфікацыйным раўндзе чарнагорцы Данцы Ковініч (114) - 4:6, 2:6.
Турнір у Мюнхене завершыцца 1 мая, а ў Мадрыдзе - 7 мая.-0-
