27 жніўня, Мінск /Кар. БЕЛТА/. Беларускі тэнісіст Ілья Івашка (63-ы нумар сусветнага рэйтынгу) прабіўся ў паўфінальную стадыю турніру ў амерыканскім горадзе Уінстан-Сейлем з прызавым фондам $717,9 тыс., паведамляе карэспандэнт БЕЛТА.
У чвэрцьфінале беларус перамог у двух сэтах іспанца Пабла Карэньё-Бусту (12) - 7:6 (7:2), 6:3. Да гэтага Ілья Івашка быў мацнейшы за італьянца Андрэаса Сэпі (88) - 6:4, 6:4, потым перамог харвата Марына Чыліча (36) - 4:6, 7:5, 6:4, а ў 1/8 фіналу не пакінуў шанцаў нямецкаму тэнісісту Яну-Ленарду Штруфу (52) - 6:2, 6:1. У паядынку за выхад у фінал сапернікам беларуса будзе фінскі тэнісіст Эміл Руусуворы (76).
На жаночым турніры ў амерыканскім Кліўлендзе з прызавым фондам $235 тыс. беларуска Аляксандра Сасновіч (99) прайграла ў чвэрцьфінале румынцы Ірыне Бегу (74) - 2:6, 4:6. На старце спаборніцтваў беларуска выйграла ў амерыканскай тэнісісткі Крысціны Макхейл (119) - 6:4, 7:5, а ў 1/8 фіналу перамагла прадстаўніцу Аргенціны Надзю Падарошка (37) - 6:7 (7:9), 6:4, 6:4.
Гэтыя турніры з'яўляюцца апошняй праверкай сіл перад стартам апошняга ў сезоне турніру серыі "Вялікага шлема" - адкрытага чэмпіянату ЗША, які пройдзе з 30 жніўня па 12 верасня ў Нью-Ёрку.-0-
