30 красавіка, Мінск /Кар. БЕЛТА/. Футбалісты барысаўскага БАТЭ прабіліся ў фінал розыгрышу Кубка Беларусі, перамогшы па суме дзвюх сустрэч мазырскую "Славію", паведамляе карэспандэнт БЕЛТА.
Пасля паражэння ў Мазыры ў першым паўфінальным матчы з лікам 0:1 29 красавіка падапечныя Кірыла Альшэўскага на полі "Барысаў-Арэны" ўзялі рэванш - 2:0. У першым тайме гаспадары двойчы дабіліся поспеху: на 12-й мінуце Захар Волкаў адкрыў лік, а перад самым перапынкам абаронца мазыран Ігар Ціманюк зрэзаў мяч у свае вароты. У другім тайме госці шмат атакавалі, але так і не змаглі паразіць вароты сапернікаў.
Першымі фіналістамі кубкавага розыгрышу сталі футбалісты брэсцкага "Дынама", якія па суме дзвюх паўфінальных гульняў узялі верх над салігорскім "Шахцёрам". У Брэсце дынамаўцы перамаглі з рэзультатам 2:0, а 29 красавіка ў Салігорску ўступілі 2:4, але дзякуючы двум мячам, забітым на чужым полі, выйшлі ў фінал.
Вырашальны паядынак 29-га кубкавага розыгрышу паміж брэсцкім "Дынама" і БАТЭ павінен адбыцца 24 мая на полі мінскага стадыёна "Дынама". У мінулыя гады абодва цяперашнія фіналісты па тры разы станавіліся ўладальнікамі гэтага трафея.
У вырашальным матчы мінулага кубкавага розыгрышу футбалісты "Шахцёра" трэці раз заваявалі трафей, перамогшы "Віцебск" на яго стадыёне з рэзультатам 2:0.-0-
