Баскетбалісты "Бостана" сталі першымі фіналістамі сезона НБА

28 мая, Мінск /Кар. БЕЛТА/. Баскетбалісты "Бостан Селтыкс" выйшлі ў фінал плэй-оф Нацыянальнай баскетбольнай асацыяцыі сезона 2023/24, паведамляе карэспандэнт БЕЛТА.

У фінальнай серыі Усходняй канферэнцыі бостанцы ўсухую абыгралі "Індыяну Пэйсерс" (4:0). Чацвёрты паядынак процістаяння праходзіў мінулай ноччу ў Індыянапалісе. У заключнай чвэрці гаспадары вялі з адрывам у дзевяць ачкоў, але правалілі канцоўку і ў выніку ўступілі - 102:105. Гэты паядынак стаў трэцім у серыі, які "Індыяна" прайграла, маючы лідарства за некалькі хвілін да сірэны. Лідар "Селтыкс" Джэйсан Тэйтум набраў сёння 26 ачкоў, аформіў 10 падбораў і аддаў 8 перадач.

"Бостан" выйшаў у фінал НБА другі раз за тры сезоны, у 2022-м годзе "кельты" ўступілі ў вырашальнай серыі "Голдэн Стэйт Уорыярз" (2:4). Усяго ў актыве "зялёных" рэкордныя 17 чэмпіёнстваў, апошняе з якіх было заваявана 16 гадоў таму. Раней у сезоне 23/24 "Селтыкс" сталі пераможцамі рэгулярнага чэмпіянату, а ў плэй-оф прайшлі "Маямі Хіт" (4:1) і "Кліўленд Кавальерс" (4:1). Сапернік "Бостана" па фінале НБА вызначаецца ў пары "Даласа" і "Мінесоты", пасля трох матчаў у гэтай серыі наперадзе тэхасцы - 3:0. Чацвёрты паядынак фіналу Заходняй канферэнцыі адбудзецца бліжэйшай ноччу ў Даласе.-0-