27 верасня, Мінск /Кар. БЕЛТА/. Хакеісты бабруйскага "Дынама-Шынніка" абыгралі ХК "СКА-Карэлія" ў чарговым матчы рэгулярнага чэмпіянату Маладзёжнай хакейнай лігі, паведамляе карэспандэнт БЕЛТА.
Сустрэча каманд прайшла на сталічнай "Алімпік-Арэне", паколькі пляцоўка "Бабруйск-Арэны" цяпер прыводзіцца ў адпаведнасць патрабаванням МХЛ. У кожным з перыядаў паядынку ў Мінску юныя дынамаўцы вызначыліся па разе: у стартавай трэці наперад каманду вывеў Данііл Сацішвілі, у наступным адрэзку Ягор Сяўко падвоіў перавагу гаспадароў, а ў фінальнай 20-мінутцы Ягор Ігнаценка ўстанавіў канчатковы лік - 3:0. Галкіпер "шыннікаў" Іван Лушчык аформіў першы шатаўт у лізе.
Такім чынам, "Дынама-Шыннік" выйграў чатыры дамашнія матчы з чатырох: раней беларусы двойчы былі мацнейшыя за "СКА-Варагаў" з Ленінградскай вобласці (5:4, 3:2), а за дзень за гэтага разграмілі тую ж "СКА-Карэлію" з Кондапагі - 8:1. Дзякуючы пераможнай серыі бабруйчане ўпершыню ўвайшлі ў зону плэй-оф Заходняй канферэнцыі МХЛ, падняўшыся на 6 месца сярод 19 каманд.
Наступны матч юныя дынамаўцы правядуць 4 кастрычніка дома супраць маскоўскіх "Крылаў Саветаў".-0-
