14 студзеня, Мінск /Кар. БЕЛТА/. Беларуская тэнісістка Арына Сабаленка (12-ы нумар сусветнага рэйтынгу) паспяхова стартавала на турніры ў аўстралійскай Адэлаідзе з прызавым фондам $780 тыс., паведамляе карэспандэнт БЕЛТА.
Сёння ў паядынку 1/16 фіналу адзіночнага разраду з прадстаўніцай кітайскага Тайбэя Се Шувэй (36) беларуска прайграла першы сэт 5:7, а затым узяла рэванш з лікам 6:1.
У вырашальнай партыі Арына Сабаленка ўступала 3:5, але здолела змяніць ход гульні і выйграла чатыры геймы запар - 7:5. Сустрэча прадаўжалася 2 гадзіны 8 мінут. У матчы за выхад у чвэрцьфінал саперніцай Арыны Сабаленка будзе амерыканская тэнісістка Бернарда Пера (70).
Яшчэ адна беларуска Аляксандра Сасновіч (99) на старце адзіночнага разраду прайграла амерыканцы Даніэль Колінз (27). Сёння ў 1/8 фіналу парнага разраду Аляксандра Сасновіч і Вікторыя Галубіч са Швейцарыі ва ўпартай двухгадзіннай барацьбе ўступілі амерыканскаму тандэму Сафія Кенін / Бетані Матэк-Сандс - 5:7, 7:6, 5:10.
Турнір у Адэлаідзе завершыцца 18 студзеня. Пасля гэтага лепшыя тэнісісткі перабазіруюцца ў Мельбурн, дзе з 20 студзеня па 2 лютага пройдзе першы ў сезоне турнір серыі "Вялікага шлема" - адкрыты чэмпіянат Аўстраліі.-0-