9 кастрычніка, Мінск /Кар. БЕЛТА/. Беларуская тэнісістка Арына Сабаленка з перамогі стартавала на турніры ў кітайскім Цяньцзіне з прызавым фондам $750 тыс., паведамляе карэспандэнт БЕЛТА.
Сёння ў матчы 1/16 фіналу Арына Сабаленка (11-ы нумар сусветнага рэйтынгу) абыграла прадстаўніцу ЗША Сафію Кенін (50) - 7:6 (7:4), 4:6, 6:0. Першую партыю беларуска пачала з пройгрышу двух геймаў запар, але затым дагнала саперніцу і вырвала перамогу на тай-брэйку. Другі сэт таксама выдаўся вельмі напружаным, у выніку Сафія Кенін змагла выйграць з двума брэйкамі. У вырашальнай партыі барацьбы не атрымалася - Арына Сабаленка адразу ўзяла руль кіравання ў свае рукі і перамагла, не аддаўшы ні аднаго гейма. Сустрэча працягвалася 2 гадзіны 4 мінуты. Цяпер у паядынку за выхад у чвэрцьфінал Арына Сабаленка сустрэнецца з польскай тэнісісткай Магдай Лінет (84), якая абыграла на старце расіянку Яўгенію Родзіну (85) - 2:6, 6:1, 6:4.
Пазней на турніры ў аўстрыйскім Лінцы з прызавым фондам $250 тыс. беларуска Вера Лапко (62) у стартавай сустрэчы будзе сапернічаць з Беліндай Бенчыч (41) са Швейцарыі. У парным разрадзе Вера Лапко і Мэндзі Мінела з Люксембурга згуляюць з бельгійска-шведскім тандэмам Кірстэн Фліпкенс / Юхана Ларсан.
У парным разрадзе турніру ў Ганконгу, прызавы фонд якога складае $750 тыс., беларуска Лідзія Марозава і японка Сюко Ааяма сустрэнуцца з аўстралійска-сербскім дуэтам Арына Радзівонава / Аляксандра Круніч.
Спаборніцтвы ў Ганконгу, Лінцы і Цяньцзіне завершацца 14 кастрычніка.-0-