14 студзеня, Мінск /Кар. БЕЛТА/. Беларуска Аляксандра Сасновіч (31-ы нумар сусветнага рэйтынгу) перамагла ў стартавым паядынку адкрытага чэмпіянату Аўстраліі ў тэнісе ў Мельбурне, паведамляе карэспандэнт БЕЛТА.
У першым раўндзе Аляксандра Сасновіч не мела асаблівых праблем у гульні з бельгійкай Кірстэн Фліпкенс (50), атрымаўшы перамогу ў двух сэтах - 6:1, 6:1. Сустрэча прадаўжалася ўсяго 58 мін. У 1/32 фіналу беларуска сустрэнецца з эстонкай Анет Кантавейт (20).
Першай з беларусак у другі раўнд Australian Open выйшла 11-я ракетка планеты Арына Сабаленка, якая абыграла сёння расіянку Ганну Калінскую (146) - 6:1, 6:4. У другім крузе Арына Сабаленка будзе сапернічаць з брытанкай Кэці Бултэр (99).
Вера Лапко (62) завяршыла выступленне ў адзіночным разрадзе, уступіўшы шведскай тэнісістцы Юхане Ларсан (77).
Двухразовая пераможца аўстралійскага першынства Вікторыя Азаранка (53) свой першы матч правядзе 15 студзеня супраць нямецкай тэнісісткі Лаўры Зігемунд (110). Таксама заўтра ў мужчынскім адзіночным разрадзе беларус Ілья Івашка (84) сустрэнецца з туніскім тэнісістам Малікам Жазіры (43).-0-
