4 кастрычніка, Мінск /Кар. БЕЛТА/. Бронзавая медалістка Гульняў у Токіа Аліна Гарнасько выйграла чэмпіянат Беларусі па мастацкай гімнастыцы ў мнагабор'і, паведамілі БЕЛТА ў прэс-службе Беларускай асацыяцыі гімнастыкі.
Падагульняючая ацэнка падапечнай Марыны Лобач - 106,250 бала. Найбольш паспяхова медалістка галоўных стартаў чатырохгоддзя ў сталіцы Японіі выканала практыкаванні з абручом (27,400 бала) і стужкай (24,900).
Серабро ў мнагабор'і выйграла яшчэ адна ўдзельніца Гульняў у Токіа Настасся Салас - 102,900 бала. Ёй найбольш удаліся кампазіцыі з мячом (28,450) і булавамі (27,600). Бронзавую ўзнагароду заваявала Арына Краснаруцкая (89,400).
У фіналах асобных відаў трэба адзначыць выступленне Яны Стрыгі, якой удалося пакінуць за сабой золата ў стартах з абручом і стужкай. Ганна Каменшчыкава лепш за іншых справілася з мячом. Арына Краснаруцкая не ведала сабе роўных у практыкаваннях з булавамі.
Каманда РЦАР-1 першынствавала ў мнагабор'і групавых практыкаванняў. Гэтая ж дружына выйграла залатыя медалі ў практыкаваннях асобных відаў: з пяццю мячамі і пяццю стужкамі.
Спаборніцтвы праводзіліся анлайн. Кожная ўдзельніца дэманстравала праграмы ў сваёй роднай зале. Іх выступленні трансліраваліся ў Палацы гімнастыкі, дзе і выстаўляліся ацэнкі.-0-
