14 верасня, Масква /Эдуард Півавар - БЕЛТА/. Неабходна прадаўжаць барацьбу за права спартсменам выступаць пад сваім сцягам. Аб гэтым заявіў алімпійскі чэмпіён у веславанні на каноэ, старшыня Камісіі спартсменаў Нацыянальнага алімпійскага камітэта Беларусі Аляксандр Багдановіч на праходзячым у Маскве сумесным пасяджэнні камісій спартсменаў НАК і Алімпійскага камітэта Расіі, перадае карэспандэнт БЕЛТА.
"Больш за 20 міжнародных федэрацый ужо прынялі рашэнне аб допуску беларускіх і расійскіх атлетаў. Вядома, статус нашых спартсменаў на гэтых турнірах нас не задавольвае. Неабходна прадаўжаць змагацца за права выступаць пад сваімі нацыянальнымі сімваламі. Гэта вельмі важна для спартсменаў, можаце мне верыць, як чалавеку, які пасля перамогі на Алімпіядзе вярнуўся ў аэрапорт у Мінск і бачыў, колькі людзей са сцягамі сустракалі нас", - сказаў праслаўлены спартсмен.
Усяго ў мерапрыемстве, якое праходзіць у Маскве 14-15 верасня, удзельнічаюць больш за 250 чалавек. Беларускую дэлегацыю ўзначальвае прэзідэнт НАК Віктар Лукашэнка. Ад Беларусі таксама прыехалі выконваючая абавязкі генеральнага сакратара НАК Беларусі Ксенія Санковіч, старшыня Камісіі спартсменаў Аляксандр Багдановіч, член камісіі Людміла Калінчык, а таксама запрошаныя атлеты Карына Дзёмінская (стральба з лука), Руслан Скамарошка (плаванне), Павел Дзік (лыжная акрабатыка) і іншыя. Расійскі бок прадстаўляюць удзельнікі Алімпійскіх гульняў Настасся Максімава, Яўген Рылаў, Артур Далалаян, Мікіта Нагорны, Алія Мустафіна, Сафія Пазнякова, Аляксандр Траццякоў і іншыя.
Акрамя пленарнага пасяджэння арганізатары прадугледзелі работу круглых сталоў, якія праходзяць у фармаце дыскусійных груп, дзе абмяркоўваюцца тэмы, што ўяўляюць цікавасць як для дзеючых спартсменаў, так і для тых, хто завяршыў або завяршае спартыўную кар'еру. Па выніках абмеркавання ў кожнай дыскусійнай групе будуць выпрацаваны рабочыя дакументы з прапановамі і пажаданнямі ўдзельнікаў.-0-
