25 мая, Мінск /Кар. БЕЛТА/. Двухразовы чэмпіён свету Алім Селімаў выбраны новым старшынёй Беларускай федэрацыі барацьбы. Справаздачна-выбарная канферэнцыя грамадскага аб'яднання адбылася ў Мінску, паведамілі БЕЛТА ў прэс-службе НАК.
Адзіным канкурэнтам Аліма Селімава ў барацьбе за пасаду старшыні быў ранейшы кіраўнік арганізацыі, алімпійскі чэмпіён Камандар Маджыдаў. У выніку тайнага галасавання за новага кіраўніка БФБ аддалі галасы 28 дэлегатаў, за яго апанента - 25.
Нагадаем, што па выніках адбору на галоўныя старты чатырохгоддзя ў Токіа беларускія барцы заваявалі восем алімпійскіх ліцэнзій, чатыры з іх у вольнай барацьбе. Тры на рахунку прадстаўніц жаночай барацьбы і адна ў стартах грэка-рымскага стылю.
Алімпійскі чэмпіён 1988 года Камандар Маджыдаў быў выбраны старшынёй Беларускай федэрацыі барацьбы ў маі 2017 года, змяніўшы на гэтай пасадзе Аляксандра Дубкоўскага.-0-