7 лютага, Мінск /Кар. БЕЛТА/. Лёгкаатлетка Алёна Дубіцкая заваявала сярэбраную ўзнагароду на міжнародным турніры Orlen Copernicus Сup у Польшчы, паведамляе карэспандэнт БЕЛТА.
У лепшай спробе беларуска адправіла снарад на 18 м 91 см. Усяго шэсць сантыметраў у Алёны Дубіцкай выйграла Крысціна Шваніц з Германіі - 18 м 97 см. Бронзавым прызёрам турніру стала Джэсіка Рэмсі з ЗША - 18 м 73 см. Двухразовая чэмпіёнка Еўропы ў штурханні ядра ў памяшканні Аніта Мартан заняла толькі сёмае месца - 18 м 03 см.
У іншым турніры па лёгкай атлетыцы ў Брно (Чэхія) беларуска Карына Таранда ў скачках у вышыню заняла другое месца з рэзультатам 1 м 94 см. У Тарту (Эстонія) у сектары для штурхання ядра ў мужчын Аляксей Нічыпар стаў першым - 18 м 95 см, а Станіслаў Дарагакупец атрымаў перамогу ў бегу на 60 м з рэзультатам 6,83 сек.
Асноўным стартам для беларускіх лёгкаатлетаў у бягучым зімовым сезоне стане чэмпіянат Еўропы ў закрытых памяшканнях, які з 1 па 3 сакавіка пройдзе ў Глазга.-0-
