"Знаходзім агульныя падыходы". Сергяенка аб збліжэнні сістэм аховы здароўя Беларусі і Расіі

30 верасня, Мінск /Кар. БЕЛТА/. Старшыня Палаты прадстаўнікоў Нацыянальнага сходу Ігар Сергяенка ў эфіры тэлеканала СТБ расказаў аб перспектывах збліжэння сістэм аховы здароўя Беларусі і Расіі па выніках пасяджэння Савета Парламенцкага сходу Саюза Беларусі і Расіі 23 верасня ў Магілёве, паведамляе БЕЛТА.

"У цэлым сістэма аказання медыцынскай дапамогі - і экстраннай, і планавай - створана і адрэгулявана міжурадавым пагадненнем 2006 года, - сказаў Ігар Сергяенка. - Але мы прыйшлі да высновы ў ходзе нарады, што наспела неабходнасць яшчэ раз паглядзець на гэта міжурадавае пагадненне. Магчыма, яго трэба актуалізаваць, дапрацаваць, дадаць яшчэ і іншыя катэгорыі. Другая тэма - аказанне высокатэхналагічнай дапамогі жыхарам нашай краіны ў Расійскай Федэрацыі і, адпаведна, расіянам у нас: тут таксама ёсць перспектыўныя напрамкі развіцця".

Паводле слоў Ігара Сергяенкі, на пасяджэнні размова таксама ішла аб стажыроўках медыцынскіх работнікаў - урачоў высокай кваліфікацыі. "Мы знаходзім агульныя падыходы, хоць гэта складана, таму што першапачаткова сістэма аховы здароўя Расійскай Федэрацыі пабудавана на прынцыпах абавязковага медыцынскага страхавання, а ў нас - дзяржаўная падтрымка бюджэтная, - удакладніў ён. - Мы развіваемся крыху ў розных напрамках, але тым не менш агульныя падыходы знаходзім".-0-