24 чэрвеня, Брэст /Кар. БЕЛТА/. З'яўленне індыйскага штама каранавіруса ў Беларусі актуалізуе задачу па вакцынацыі насельніцтва. Аб гэтым заявіў сёння журналістам міністр аховы здароўя Дзмітрый Піневіч на пасяджэнні Брэсцкага аблвыканкама, перадае карэспандэнт БЕЛТА.
"З'яўленне індыйскага штама для нас - чарговая падстава актуалізаваць работу, а для грамадзян - вакцынавацца. Вакцыны цяпер хапае, паводле нашых даных. Любы тып вакцын мае ахоўную ўласцівасць і не прыводзіць да цяжкіх наступстваў. Таму вывад вельмі просты: вакцынацыя - адзін з найважнейшых кампанентаў разам з сацыяльным дыстанцыраваннем і іншымі мерамі прафілактыкі захворвання", - сказаў міністр.
Міністэрства аховы здароўя 23 чэрвеня паведаміла, што ў рэспубліцы выяўлены індыйскі варыянт каранавіруса. "Першыя выпадкі з'явіліся, яны будуць пашырацца. Гэта закон эпідэміялогіі: калі штам з'явіўся, ён будзе развівацца. Гэтак жа было з брытанскім штамам, які цяпер у нас пераважае. У тым, што штам будзе мяняцца, не бачу прычын для вялікай панікі. Але тое, што мы бачым па заявах нашых калег з Усходу, з Расіі, - менавіта індыйскі штам каранавіруса "Дэльта" паслужыў прычынай больш высокага ўзроўню захваральнасці", - адзначыў Дзмітрый Піневіч.
У сувязі з гэтым Міністэрства аховы здароўя па ўзгадненні з мясцовымі органамі ўлады, упраўленнямі па ахове здароўя рэкамендуе па-ранейшаму трымаць у рэзерве свабодныя ложкі на выпадак уздыму захваральнасці. Напрыклад, у Брэсце цяпер каля 500 такіх ложкаў - у абласной, цэнтральнай і першай гарадской бальніцах.
Паводле слоў начальніка галоўнага ўпраўлення аховы здароўя аблвыканкама Віктара Міхалоўскага, цяпер узровень захваральнасці на COVID-19 у рэгіёне складае 25 працэнтаў ад пікавага значэння 2020 года. Сітуацыя кіруемая і знаходзіцца пад кантролем.
У аблвыканкаме сёння абмяркоўваліся меры па матэрыяльна-тэхнічным і кадравым забеспячэнні, павышэння якасці медыцынскіх паслуг ва ўстановах аховы здароўя Брэсцкай вобласці.-0-
