15 верасня, Мінск /Кар. БЕЛТА/. Землі Смалявіцкага раёна пад рэалізацыю праекта аэрапорта Мінск прапануецца ўключыць у склад горада. Дэпутаты Мінскага гарадскога Савета адобрылі ўнясенне прапаноў у Савет Міністраў аб змяненні межаў Мінска і Кастрычніцкага раёна горада, перадае карэспандэнт БЕЛТА.
Як адзначыла начальнік Мінскай гарадской землеўпарадкавальнай і геадэзічнай службы Наталля Цюпцянкова, неабходнасць прыняцця такога рашэння абумоўлена рэалізацыяй праекта будаўніцтва ў Нацыянальным аэрапорце Мінск другой штучнай узлётна-пасадачнай паласы з аб'ектамі дапаможнага прызначэння пад разліковы тып самалёта А380 з абсталяваннем яе сістэмай дакладнага заходу на пасадку трэцяй катэгорыі. Рэалізацыя праекта патрабуе займання дадатковых зямельных участкаў Смалявіцкага раёна плошчай 158,44 га. Гэтыя землі (дзяржаўнай лесагаспадарчай установы "Смалявіцкі лясгас" і замежнага прыватнага ўнітарнага сельскагаспадарчага прадпрыемства "Штотц Агра-Сэрвіс") прапануецца ўключыць у склад Мінска.
"У адпаведнасці з законам аб адміністрацыйна-тэрытарыяльным падзеле Беларусі і палажэннем аб парадку падрыхтоўкі і падачы дакументаў для прыняцця рашэнняў па пытаннях адміністрацыйна-тэрытарыяльнага ўладкавання, зацверджанага пастановай Савета Міністраў ад 6 ліпеня 2012 года нумар 623, працэдурна патрабуецца прыняцце Мінскім гарадскім Саветам дэпутатаў рашэння аб унясенні ў Савет Міністраў Беларусі прапановы аб унясенні прадстаўлення Прэзідэнту па пытаннях змянення межаў Мінска і Кастрычніцкага раёна", - адзначыла Наталля Цюпцянкова.-0-
