Законапраект аб прызнанні кваліфікацыі абмяркоўваецца на Экспертным савеце пры Савеце Рэспублікі

6 мая, Мінск /Кар. БЕЛТА/. Законапраект аб прызнанні кваліфікацыі абмяркоўваецца 6 мая на Экспертным савеце пры Савеце Рэспублікі пад старшынствам спікера Наталлі Качанавай, перадае карэспандэнт БЕЛТА.

Як адзначыла спікер, гэта ўжо другое абмеркаванне законапраекта на Экспертным савеце. "Мы сёння запрасілі ўсіх членаў Савета Рэспублікі, якія ўзначальваюць прадпрыемствы, каб абмеркаваць гэты законапраект яшчэ раз. Мы ўжо гэта пытанне разглядалі, але гэты закон неадназначна ўспрымаецца. Таму яшчэ раз хочам яго разгледзець на пасяджэнні Экспертнага савета, паўтаруся, з прыцягненнем шырокага кола спецыялістаў", - падкрэсліла Наталля Качанава.
Як растлумачыў журналістам член Пастаяннай камісіі па эканоміцы, бюджэце і фінансах Савета Рэспублікі, генеральны дырэктар ААТ "Гомсельмаш" Аляксандр Новікаў, да неабходнасці распрацоўкі гэтага законапраекта падштурхнула жыццё. "Здараюцца сітуацыі (думаю, кожнае прадпрыемства з імі так ці інакш сутыкаецца), калі чалавек чатыры, пяць, шэсць гадоў працуе па той ці іншай спецыяльнасці, фактычна мае кваліфікацыю і разрад, але пры гэтым не мае адпаведнага пацвярджаючага дакумента. Закон, праект якога намі сёння разглядаецца, дазволіць максімальна хутка атрымаць такі дакумент, а таксама запоўніць дэфіцыт кадраў. Інакш кажучы, гэта выгадна і людзям, і прадпрыемствам", - адзначыў ён.