12 жніўня, Мінск /Кар. БЕЛТА/. Беларускі рэспубліканскі саюз моладзі з верасня пачне прымаць заяўкі на другі сезон рэспубліканскага конкурсу маладзёжных ініцыятыў, паведаміў карэспандэнту БЕЛТА сакратар ЦК БРСМ Павел Алекса.
"Конкурс маладзёжных ініцыятыў будзе прадоўжаны, абноўлена яго палажэнне. З верасня плануем даць старт другому сезону. Важна, каб прэтэндэнты на гранты адказна паставіліся да падрыхтоўкі заявак", - сказаў Павел Алекса.
Праект запусцілі ў мінулым годзе. У красавіку былі вызначаны пераможцы. На конкурс паступіла 493 заяўкі. У выніку было адабрана 18 лепшых праектаў, якія атрымалі фінансаванне на рэалізацыю. На сённяшні дзень ёсць рэалізаваныя праекты. Так, Ліга камуністычнай моладзі правяла рэспубліканскі форум "Народная Беларусь". Лепельскі агратэхнічны каледж закупіў неабходны набор музычных інструментаў для інклюзіўнага вакальна-інструментальнага ансамбля "Ударнае жыццё" і цяпер удзельнікі калектыву рыхтуюцца да справаздачнага канцэрта. Рэчыцкі цэнтр творчасці дзяцей і моладзі запусціў праект "Валанцёры кібербяспекі". З тых праектаў, якія цяпер знаходзяцца ў развіцці, адзін з яркіх - будаўніцтва скаладрома ў Брэсце, ён на 50 працэнтаў гатовы. Ужо відаць яго контуры, хутка жыхары і госці Брэста атрымаюць магчымасць асвоіць папулярны від спорту. У дзень стварэння Беларускай рэспубліканскай піянерскай арганізацыі, 13 верасня, у кожнай вобласці пачнуць работу інфармацыйна-адукацыйныя модулі БРПА як новай мадэлі патрыятычнага выхавання дзяцей і падлеткаў.
"Хацелася б, каб колькасць удзельнікаў у гэтым годзе ўзрасла, каб у кожнага была магчымасць рэалізаваць сваю ініцыятыву", - дадаў Павел Алекса.
Арганізатарам праекта выступае БРСМ пры падтрымцы Міністэрства адукацыі і Банка развіцця. Яго мэта - ацэнка і адбор маладзёжных ініцыятыў, накіраваных на ўключэнне моладзі ў творчую дзейнасць і сацыяльную практыку, павышэнне грамадзянскай актыўнасці, раскрыццё патэнцыялу.-0-
