11 ліпеня, Мінск /Кар. БЕЛТА/. Саўінфармбюро 3 ліпеня 1944 года паведамляла, што "войскі 3-га Беларускага фронту пры садзейнічанні войскаў 1-га Беларускага фронту ў выніку імкліва праведзенай аперацыі з глыбокім абходным манеўрам з флангаў штурмам завалодалі сталіцай Савецкай Беларусі горадам Мінск, а таксама з баямі занялі больш за 450 іншых населеных пунктаў". Аднак баі ў так званым Мінскім катле, дзе ў акружэнне савецкіх войскаў трапіла 105-тысячная нямецкая групоўка войскаў, прадаўжаліся практычна да 11 ліпеня.
Гэта быў ужо чацвёрты кацёл з пачатку аперацыі "Баграціён", у які трапілі немцы на беларускай зямлі. Першым стаў Віцебскі, дзе былі акружаны больш за 25 тыс. гітлераўцаў, другім - Бабруйскі (паводле розных ацэнак, ад 40 тыс. да 70 тыс.), трэці - пад Магілёвам, дзе толькі ў бітве за горад немцы страцілі да 10 тыс. забітымі і палоннымі.
З выхадам злучэнняў 3-га і 1-га Беларускіх франтоў да Мінска і ў раёны на паўночны захад, поўдзень і паўднёвы захад было завершана акружэнне 4-й нямецкай арміі і іншых часцей групы армій "Цэнтр". Нямецкае камандаванне паспрабавала аб'яднаць свае разрозненыя сілы і вывесці іх на захад, але гэтым планам не суджана было ажыццявіцца.
Вялікую дапамогу ў разгроме варожай групоўкі праціўніка пад Мінскам аказалі партызанскія фарміраванні Мінскай, Баранавіцкай і Вілейскай абласцей. Да 12 ліпеня партызаны і рэгулярныя часці прачэсвалі лясы, абясшкоджваючы дробныя групы акружэнцаў. Пасля гэтага баі на ўсход ад Мінска канчаткова спыніліся. Больш за 70 тыс. нямецкіх салдат загінулі, больш за 35 тыс. трапілі ў палон.
Беларуская аперацыя прадоўжылася наступленнем савецкіх войскаў па ўсіх франтах.-0-
Падпісвайцеся на нас у
