6 лютага, Мінск /Кар. БЕЛТА/. Выпускныя экзамены ў 9-х класах школ Беларусі пройдуць з 1 па 9 чэрвеня. Такая інфармацыя размешчана на сайце Міністэрства адукацыі, паведамляе БЕЛТА.
Выпускныя экзамены на ІІ ступені агульнай сярэдняй адукацыі пройдуць з 1 па 9 чэрвеня (асноўныя тэрміны) і з 21 па 25 жніўня (іншыя тэрміны).
Экзамены для вучняў, якія асвойваюць змест праграмы базавай адукацыі, вучняў з парушэннямі функцый апорна-рухальнага апарату, парушэннямі зроку, цяжкасцямі ў навучанні, для вучняў першага аддзялення спецшколы, спецшколы-інтэрната для вучняў з парушэннямі слыху, якія асвойваюць змест праграмы спецыяльнай адукацыі на ўзроўні агульнай сярэдняй адукацыі, праводзяцца ў форме пераказаў па беларускай і рускай мовах (на гэта адводзіцца па чатыры астранамічныя гадзіны), у форме кантрольнай работы па матэматыцы (адводзіцца чатыры астранамічныя гадзіны), а таксама ў вуснай форме па білетах па гісторыі Беларусі. Большасць дзевяцікласнікаў пераказ па беларускай мове напішуць 1 чэрвеня, пераказ па рускай мове - 5 чэрвеня, кантрольная работа па матэматыцы адбудзецца 7 чэрвеня.
Іспыты па пісьмовых прадметах пачнуцца ў 9 гадзін. Тэксты і заданні будуць аб'яўлены праз сродкі масавай інфармацыі - па тэлебачанні і радыё, а таксама будуць размешчаны на сайце Міністэрства адукацыі.
Экзаменацыйныя білеты па гісторыі Беларусі размешчаны на Нацыянальным адукацыйным партале і на сайце Міністэрства адукацыі. У ведамстве звярнулі ўвагу, што другое пытанне білета прадугледжвае выкананне практычнага задання, накіраванага на праверку ўмення вучняў працаваць з рознымі крыніцамі гістарычнай інфармацыі: фрагментам гістарычнага дакумента, гістарычнай картай, схемай, табліцай, дыяграмай, графікам, фрагментам артыкула і ілюстрацыяй. У гэтым навучальным годзе экзамен будзе праводзіцца з выкарыстаннем адзіных практычных заданняў, якія з'явяцца на Нацыянальным адукацыйным партале 25 мая. Яны ў сваю чаргу будуць выбраны з распрацаваных настаўнікамі гісторыі заданняў, якія ўжо размешчаны на партале ў рубрыцы "Практычныя заданні для выпускнога экзамену" і рэкамендаваны да выкарыстання для падрыхтоўкі да экзамену.
Пачынаючы з 25 мая ў школах павінны праводзіцца кансультацыі па падрыхтоўцы да выпускных экзаменаў па раскладзе, зацверджаным кіраўніком установы адукацыі.-0-
