21 красавіка, Мінск /Кар. БЕЛТА/. Намеснік дырэктара па навуковай рабоце Інстытута радыебіялогіі НАН Аляксандр Нікіцін расказаў аб даследаваннях у Палескім дзяржаўным радыяцыйна-экалагічным запаведніку ў час пасяджэння праекта БЕЛТА "Экспертнае асяроддзе" на тэму "Пераадоленне наступстваў катастрофы на Чарнобыльскай АЭС: меры па сацыяльна-эканамічным развіцці пацярпелых тэрыторый".
"У нашай краіне ёсць месца, дзе сканцэнтравана вельмі высокая актыўнасць радыенуклідаў, - Палескі дзяржаўны радыяцыйна-экалагічны запаведнік. Асноўная задача - папярэджанне вынасу радыенуклідаў за межы гэтага запаведніка, ахова людзей ад уздзеяння радыяцыі. На гэтай тэрыторыі прадаўжаюць даследаваць у значным маштабе паводзіны радыенуклідаў, іх міграцыю ў экасістэмах", - сказаў Аляксандр Нікіцін.
Паводле яго слоў, на тэрыторыі запаведніка аднаўляюцца экасістэмы, з'яўляюцца пастаянныя новыя віды раслін і жывёл. "Міжнародная навуковая супольнасць выказвае цікавасць да такога біярэзервату, дзе вельмі шмат чырванакніжных відаў, у прыватнасці рэдкіх птушак. У запаведніку сканцэнтравана адна з самых вялікіх вольнажывучых папуляцый зубра, які быццам бы нядрэнна сябе адчувае. Там ёсць і ўнікальны для Беларусі від - конь Пржавальскага", - адзначыў вучоны.
"Палескі радыяцыйна-экалагічны запаведнік - гэта ўнікальная навуковая пляцоўка, дзе можна адпрацоўваць спосабы абмежавання пераходу радыенуклідаў у прадукцыю, сітуацыі з выкідам радыеактыўных рэчываў у атмасферу з забруджваннем навакольнага асяроддзя. Нездарма пасля аварыі на Фукусіме да нас у запаведнік прыязджалі дэлегацыі з Японіі, каб пераняць вопыт. Лічу, што адна з важных задач, якая сёння стаіць перад навукай, - гэта глыбокае абагульненне нашага вопыту і атрыманых вынікаў, каб сабраць нейкае ядро ведаў, якое ў выпадку неабходнасці мы можам перадаць у іншыя краіны, перанесці на іншыя буйнамаштабныя надзвычайныя сітуацыі", - рэзюмаваў Аляксандр Нікіцін.-0-
