Вопыт кіраўніка, адукацыя і работа. На што робяць акцэнт выбаршчыкі пры выбары кандыдата

25 лютага, Мінск /Кар. БЕЛТА/. Супрацоўнікі Інстытута сацыялогіі Нацыянальнай акадэміі навук высветлілі, якой інфармацыяй аб кандыдаце кіруюцца выбаршчыкі, калі аддаюць за яго свой голас. Вынікамі сацыяльнага апытання з БЕЛТА падзяліўся дырэктар Інстытута сацыялогіі НАН Беларусі Мікалай Мыслівец.

У рэспубліканскім маніторынгавым даследаванні, праведзеным у чацвёртым квартале 2023 года, прыняў удзел 1851 рэспандэнт. Як паказалі вынікі, беларусы прад'яўляюць сур'ёзныя патрабаванні да тых, хто плануе быць выбраным у лік дэпутатаў самага высокага ўзроўню. Найбольшую значнасць для выбаршчыкаў пры выбары кандыдата мае наяўнасць у яго вопыту кіруючай дзейнасці. Гэты крытэрый у якасці прыярытэтнага для сябе выбралі 38,6 працэнта апытаных.

Пры выбары выбаршчыкі абапіраюцца таксама на інфармацыю аб адукацыі і сферы працоўнай дзейнасці кандыдата. Потым увага ўдзяляецца ўзросту і палітычным поглядам вылучэнца.  Прыкладна кожны трэці ўдзельнік апытання ўказаў на інтарэс да такой інфармацыі.

Ці можна ў сувязі з гэтым гаварыць аб тым, што перамагае на выбарах кандыдат, які адбыўся ў прафесіі, займае высокую пасаду і мае вялікі вопыт? "Вядома, не. Дарога адкрыта і для маладых кандыдатаў. Калі яны дзейнічаюць, прапануюць рашэнні, праяўляюць адказнасць за тых, хто гатовы аддаць за іх свае галасы, то яны, безумоўна, атрымаюць падтрымку электарату", - заўважыў Мікалай Мыслівец.-0-