5 снежня, Мінск /Кар. БЕЛТА/. Вопыт Беларусі па забеспячэнні радыяцыйнай бяспекі і яго прымяненне ў ядзернай сферы прадстаўлены на міжнароднай міністэрскай канферэнцыі па ядзернай навуцы і тэхналогіях, якая прайшла ў штаб-кватэры МАГАТЭ ў Вене, паведамілі БЕЛТА ў Дзяржатамнаглядзе.
Даклад беларускага боку прадставіла начальнік Дзяржатамнагляду Вольга Лугаўская. Адзначана, што на інфраструктуру радыяцыйнай бяспекі паўплывала аварыя на Чарнобыльскай АЭС, яе наступствы і іх пераадоленне. У прыватнасці, былі створаны сістэмы радыяцыйнага маніторынгу, кантролю радыеактыўнага забруджання прадуктаў харчавання, вядзення гаспадаркі на пацярпелых тэрыторыях, назірання за станам здароўя і лячэння пацярпелага насельніцтва, навуковага забеспячэння, сацыяльнай абароны, вытворчасці радыелагічнага абсталявання. Адначасова ў краіне развівалася прымяненне крыніц іанізуючага выпрамянення ў медыцыне, прамысловасці і іншых галінах, прадаўжаліся фундаментальныя і прыкладныя навуковыя даследаванні, у тым ліку ядзерныя.
Напрацаваны вопыт цяпер выкарыстоўваецца для развіцця інфраструктуры ядзернай і радыяцыйнай бяспекі.
"Прымяняльныя ў Беларусі падыходы і рашэнні для развіцця інфраструктуры рэгулявання ядзернай і радыяцыйнай бяспекі і яе кампанентаў усё часцей становяцца запатрабаванымі і ўяўляюць сабой цікавасць для іншых дзяржаў, а таксама міжнародных арганізацый, уключаючы МАГАТЭ", - адзначылі ў Дзяржатамнаглядзе.-0-