24 лютага, Мінск /Настасся Архіпава - БЕЛТА/. Важная задача адукацыі - фарміраваць інклюзіўную культуру грамадства. Такое меркаванне журналістам выказала сёння начальнік упраўлення інфармацыйных адукацыйных тэхналогій Нацыянальнага інстытута адукацыі Міністэрства адукацыі Ірына Харэвіч, перадае карэспандэнт БЕЛТА.
"Адным з напрамкаў адукацыі з'яўляецца фарміраванне так званай інклюзіўнай культуры грамадства, - расказала Ірына Харэвіч. - У Беларусі талерантна ставяцца як да прадстаўнікоў розных культур, так і да людзей з абмежаванымі магчымасцямі. Гэтыя паняцці павінны фарміравацца ў тым ліку і на ўзроўні адукацыі. Напрыклад, у школе, калі хлопчыкі і дзяўчынкі толькі пачынаюць знаёміцца з такімі людзьмі і ў працэсе камунікацыі разумеюць, што пры неабходнасці трэба ім дапамагчы".
Паводле яе слоў, сёння інфармацыйныя тэхналогіі актыўна ўкараняюцца ў адукацыйны працэс. На старонках падручнікаў размяшчаюцца QR-коды, якія пашыраюць існуючы кантэнт. Вучні могуць паглядзець відэафрагменты, якія дапаўняюць асноўны матэрыял, або прайсці інтэрактыўныя заданні на замацаванне ведаў. Такія вэб-тэхналогіі выкарыстоўваюцца і ў інклюзіўнай адукацыі. На нацыянальным адукацыйным партале adu.by педагогі і бацькі могуць знайсці інфармацыю, якая датычыцца інклюзіўнай адукацыі: метадычныя дапаможнікі, напрацоўкі выкладчыкаў і спецыялістаў з усёй краіны.
Начальнік аддзела навукова-метадычнага забеспячэння прафесійнай адукацыі асоб з асаблівасцямі псіха-фізічнага развіцця і агульнай сярэдняй адукацыі Рэспубліканскага інстытута прафесійнай адукацыі Алена Фалевіч прывяла ў прыклад Магілёўскі эканамічны каледж, на базе якога арганізавана эксперыментальная пляцоўка для навучэнцаў з парушэннем апорна-рухальнага апарату. Навучанне праводзіцца з максімальным выкарыстаннем элементаў дыстанцыйнага навучання.
Як невідушчы карыстальнік інтэрнэту, майстар вытворчага навучання Мінскага дзяржаўнага каледжа электронікі Аляксандр Севярын дадаў: трэба перастаць здзіўляцца таму, што людзі з абмежаванымі магчымасцямі могуць карыстацца сучаснымі тэхналогіямі. Аднак варта разумець: тэхналогіі даступныя не ўсім і не аднолькава. Таму трэба ствараць адаптаваны кантэнт, удасканальваць навыкі навучэнцаў па выкарыстанні тэхналогій і ўкараняць гэтыя тэхналогіі ў навучанне.-0-
