26 ліпеня, Мінск /Кар. БЕЛТА/. Толькі сумеснымі намаганнямі можна зрабіць свет больш бяспечным, заявіў 26 ліпеня міністр па надзвычайных сітуацыях Беларусі Уладзімір Вашчанка ў час цырымоніі ўзнагароджвання пераможцаў 4-й віктарыны "Марафон бяспекі", праводзімай на старонках газеты "7 дней", перадае карэспандэнт БЕЛТА.
Уладзімір Вашчанка падзякаваў Беларускаму тэлеграфнаму агенцтву і газеце "7 дней" за інфармацыйную падтрымку віктарыны, а таксама запэўніў, што "Марафон бяспекі" будзе мець працяг. "Адным з нашых напрамкаў з'яўляецца фарміраванне бяспечнай жыццядзейнасці кожнага грамадзяніна, - сказаў міністр. - Вельмі важна, каб усе разумелі, да чаго прыводзіць бяспечнае або халатнае стаўленне да ўласнай бяспекі. І разам мы, сродкі масавай інфармацыі, міністэрства, і ўсе вы - удзельнікі віктарыны, можам зрабіць наш свет больш бяспечным".
Генеральны дырэктар Беларускага тэлеграфнага агенцтва Ірына Акуловіч падкрэсліла: "Мы ўсе павінны разумець важнасць і каштоўнасць чалавечага жыцця, дарослыя павінны быць у бяспецы, а нашы дзеці тым больш". Яна адзначыла, што дзякуючы правільнай і зладжанай рабоце МНС, Міністэрства адукацыі і журналістаў, дзеці сёння добра ведаюць, як паводзіць сябе ў надзвычайнай сітуацыі.
Штотыднёва з 28 сакавіка на працягу двух месяцаў (8 тураў) чытачы газеты "7 дней" маглі ацаніць і папоўніць свае веды ў галіне культуры бяспекі жыццядзейнасці. За час правядзення праекта ў рэдакцыю паступіла больш за 200 пісем з розных куткоў краіны ад студэнтаў, рабочых і служачых, настаўнікаў, пенсіянераў і маці, якія знаходзяцца ў дэкрэтным водпуску, прадстаўнікоў розных арганізацый і ўстаноў.
Віктарына праводзілася ў мэтах прапаганды і папулярызацыі здаровага і бяспечнага ладу жыцця, актывізацыі інтэлектуальнага і творчага патэнцыялу, праяўлення сацыяльнай актыўнасці насельніцтва, папярэджання надзвычайных сітуацый і фарміравання ў грамадзян навыкаў эфектыўнага рэагавання ў выпадку іх узнікнення, папулярызацыі культуры бяспечнай жыццядзейнасці сярод насельніцтва, накіраванай на зніжэнне колькасці надзвычайных сітуацый і пажараў.
Дыпломам першай ступені ўзнагароджаны Мікалай Прыгодзіч з Мінска, дыпломам другой ступені - мінчанка Яўгенія Мякшыла. Трэцяе месца заняла Вераніка Раманцова са Светлагорска.
Пераможца віктарыны прызнаўся, што правільна адказаць на пытанні яму дапамаглі буклеты МНС. "Некаторыя заданні выклікалі цяжкасці з адказам нават у мяне, дарослага чалавека, але ўсе яны вельмі пазнавальныя, - сказаў Мікалай Прыгодзіч. - "Марафон бяспекі" з'яўляецца ўпрыгажэннем газеты, таму што мы не толькі больш даведваемся пра бяспечную жыццядзейнасць, але і знаходзім сяброў".
Арганізатарамі віктарыны выступілі Міністэрства па надзвычайных сітуацыях, БЕЛТА, рэдакцыя газеты "7 дней", Навукова-даследчы інстытут пажарнай бяспекі і праблем надзвычайных сітуацый МНС Беларусі і Нацыянальны цэнтр мастацкай творчасці дзяцей і моладзі. Рэпартаж з цырымоніі ўзнагароджвання будзе апублікаваны 1 жніўня ў газеце "7 дней".-0-
