19 лістапада, Мінск /Кар. БЕЛТА/. Сёння на пасяджэнні Нацыянальнага савета па працоўных і сацыяльных пытаннях адобраны падыходы, замацаваныя ў праекце Закона Рэспублікі Беларусь "Аб змяненні законаў па пытаннях працоўных адносін". Дакумент прадугледжвае ўнясенне змяненняў і дапаўненняў у Працоўны кодэкс. Намеснік міністра працы і сацыяльнай абароны Ігар Старавойтаў расказаў карэспандэнту БЕЛТА аб найбольш прыкметных навацыях, прапанаваных ведамствам.
Новае ў дыстанцыйнай рабоце
Прадугледжваюцца новыя падыходы да рэгулявання дыстанцыйнай работы. Працоўны кодэкс дапаўняецца нормамі аб тым, што дыстанцыйная работа зможа мець не толькі пастаянны характар, але і часовы (не больш за шэсць месяцаў у каляндарным годзе), а таксама ажыццяўляцца шляхам чаргавання работы дыстанцыйна і на рабочым месцы ў арганізацыі (камбінаваная работа).
"Дамоўленасці аб умовах такой работы наймальнік і работнік змогуць дасягнуць як пры прыёме на работу, так і ў перыяд працоўнай дзейнасці", - удакладніў Ігар Старавойтаў.
Выкананне дыстанцыйнай работы не запатрабуе ўнясення змяненняў у працоўны дагавор і будзе ажыццяўляцца на падставе загаду наймальніка. Але ўмова аб выкананні камбінаванай работы павінна будзе ўключацца ў працоўны дагавор.
Дадатковыя меры па ахове здароўя работнікаў
Паводле слоў намесніка міністра, новы артыкул законапраекта прадугледжвае права работніка на вызваленне ад работы для праходжання дыспансерызацыі з захаваннем сярэдняга заработку па месцы працаўладкавання. Колькасць свабодных ад работы дзён будзе вызначацца ў залежнасці ад узросту чалавека.
"Такое права будзе рэалізоўвацца шляхам падачы работнікам заявы. Пры гэтым дзень вызвалення ад работы будзе ўзгадняцца ім з наймальнікам", - дадаў Ігар Старавойтаў.
Пасля ўсіх медаглядаў работнікі будуць абавязаны прадастаўляць наймальніку дакументы, якія пацвярджаюць праходжанне імі дыспансерызацыі.
Гібкія падыходы пры выкарыстанні права на аплатны свабодны дзень у тыдзень
У Працоўным кодэксе такія больш гібкія падыходы прымяняюцца ў адносінах да бацькоў, якія выхоўваюць траіх і больш дзяцей ва ўзросце да 16 гадоў альбо дзіця-інваліда ва ўзросце да 18 гадоў.
Навацыя ў тым, што цяпер прадугледжваецца магчымасць па заяве работніка і па ўзгадненні з наймальнікам замест аднаго свабоднага дня ў тыдзень устанаўліваць работніку скарочаную працягласць работы (змены) на адну гадзіну з захаваннем заработнай платы.
Пашырэнне правоў у частцы кампенсацый па ўмовах працы
Устанаўліваецца права работніка, занятага на работах са шкоднымі і (або) небяспечнымі ўмовамі працы, па яго заяве атрымліваць замест малака або раўнацэнных харчовых прадуктаў грашовую кампенсацыю.
"Змяненні ў ПК распрацаваны міжведамаснай рабочай групай. Разам з органамі дзяржаўнага кіравання актыўны ўдзел у рабоце па падрыхтоўцы законапраекта прымалі прадстаўнікі прафсаюзаў і аб'яднанняў наймальнікаў", - падкрэсліў Ігар Старавойтаў.-0-
