10 ліпеня, Мінск /Кар. БЕЛТА/. Беларускія студэнцкія атрады ўносяць уклад у развіццё незалежнай Беларусі, заявіў карэспандэнту БЕЛТА першы сакратар ЦК БРСМ член Савета Рэспублікі Дзмітрый Варанюк.
"Працоўны маладзёжны рух заўсёды славіўся сваімі традыцыямі. І адна з іх нараўне з работай у камандзе, студатрадаўскай дружбай, братэрствам, праверанымі часам, - стваральная праца ў імя роднай краіны. Нацыянальная бібліятэка Беларусі, "Мінск-Арэна" і "Чыжоўка-Арэна", Палац Незалежнасці, новы будынак Музея гісторыі ВАВ, комплекс "Студэнцкая вёска" ў Мінску, будаўніцтва і рэканструкцыя дарог, малочнатаварных ферм, школ і бальніц, спартыўных комплексаў і жылых дамоў па ўсёй рэспубліцы - гэта толькі невялікі пералік таго, куды ўжо ўнеслі свой уклад удзельнікі беларускіх студэнцкіх атрадаў", - сказаў Дзмітрый Варанюк.
Паводле яго слоў, шырокае прыцягненне маладых людзей да вырашэння вытворчых задач - залог і надзейная аснова паступальнага развіцця айчыннай эканомікі і любой галіны. "Знакавымі аб'ектамі для студатрадаў у бягучым годзе сталі ўсебеларуская будоўля "Горад маладосці" ў Астраўцы, будаўніцтва агульнаадукацыйных сярэдніх школ у Баранавічах і Гомелі, рэканструкцыя комплексу будынкаў гарадской клінічнай бальніцы нумар 3 у Гродне, брацкага пахавання на месцы спаленай вёскі Ала ў Светлагорскім раёне. У цэнтры ўвагі - новыя паліклінікі ў Салігорску, Магілёве і многія іншыя аб'екты", - адзначыў першы сакратар ЦК БРСМ.
У гэтым годзе Рэспубліканскі штаб студэнцкіх атрадаў упершыню рэалізуе маштабны працоўнай вытворчы праект "Атлант-2020". "Гэтым летам у ім прымуць удзел амаль 800 маладых людзей з усёй Беларусі, ужо сёння працуюць 480. Моладзь працуе на "Атланце" слесарамі-зборшчыкамі бытавой тэхнікі і выконвае базавыя тэхналагічныя аперацыі па яе зборцы. За кожным удзельнікам студатрада замацаваны вопытны настаўнік", - расказаў Дзмітрый Варанюк.
Першы сакратар ЦК БРСМ падкрэсліў, што студатрадаўскі рух - не толькі адроджаная перш за ўсё для студэнтаў і навучэнскай моладзі ў Беларусі традыцыя. Гэта першыя працоўныя навыкі і магчымасць самастойнага заработку, а таксама камандная работа на агульны рэзультат. "Дзякуючы асабістай увазе кіраўніка дзяржавы наша краіна стала піянерам на постсавецкай прасторы ў падтрымцы студатрадаўскага руху на дзяржаўным узроўні. З 2005 года ў суверэннай Беларусі аднавілася традыцыя маладзёжных будоўляў, а дзяржпадтрымка дала магчымасць пашырыць сферы дзейнасці студэнцкіх атрадаў, палепшыць іх медыцынскае абслугоўванне, стварыць умовы для стымулявання наймальнікаў", - дадаў ён.
Запіс у студатрады прадаўжаецца. Падаць заяўку для работы ў трэцім працоўным семестры можна анлайн у групах БРСМ у сацсетках з выкарыстаннем QR-кода і хэштэгаў #Выбираем_студотряд!, #Студатрад, #Працуем_разам! і #БСА. У бягучым годзе для работы студэнцкіх атрадаў забраніравана каля 30 тыс. рабочых месцаў.-0-
