17 сакавіка, Мінск /Кар. БЕЛТА/. Унутраныя войскі дастойна выконваюць задачы па абароне Айчыны і нацыянальных інтарэсаў. Аб гэтым сказаў дзяржаўны сакратар Савета бяспекі Аляксандр Вальфовіч, паведамілі БЕЛТА ў МУС.
Урачысты сход і канцэрт, прысвечаныя Дню ўнутраных войскаў МУС, сабралі ў клубе в/ч 3214 ваеннаслужачых Мінскага гарнізона, галоўнага ўпраўлення камандуючага ўнутранымі войскамі, ветэранаў, курсантаў факультэта ўнутраных войскаў Ваеннай акадэміі. Свята з імі раздзялілі дзяржаўны сакратар Савета бяспекі Аляксандр Вальфовіч, міністр унутраных спраў Іван Кубракоў, кіраўнікі сілавых структур і дзяржаўных органаў.
Аляксандр Вальфовіч зачытаў віншаванне ад Прэзідэнта Беларусі Аляксандра Лукашэнкі. Звяртаючыся да прысутных з прывітальным словам, кіраўнік Савета бяспекі падкрэсліў, што ўнутраныя войскі заўсёды дастойна выконвалі задачы па абароне Айчыны і нацыянальных інтарэсаў.
Кіраўнік МУС Іван Кубракоў адзначыў: ва ўмовах вострай абстаноўкі ўнутраныя войскі дастойна забяспечваюць бяспеку дзяржавы, не даюць паставіць пад пагрозу мір і стабільнасць, штодзённа праходзячы праверку на сілу духу, волі і цярпення. "Сваім прыкладам вы пацвярджаеце права лічыцца сапраўднай ваеннай элітай, якой кіраўнік дзяржавы ўдзяляе асаблівую ўвагу і на якую ведамства ўскладае найбольш цяжкія і адказныя задачы", - сказаў ён.
Дзяржсакратар Савета бяспекі і міністр узнагародзілі ваеннаслужачых, якія асабліва вызначыліся. Таксама адбылася цырымонія ўручэння афіцэрскіх пагонаў.
Словы віншавання і ўдзячнасці за ратную працу прагучалі з вуснаў протаіерэя Фёдара Поўнага, а заслужаны ветэран Юрый Сівакоў падзяліўся ўспамінамі.
Намеснік міністра ўнутраных спраў - камандуючы ўнутранымі войскамі Мікалай Карпянкоў падзякаваў за віншаванні і высокую ацэнку дзейнасці ўнутраных войскаў, запэўніўшы: калегі гатовы і ў далейшым з гонарам выконваць пастаўленыя задачы.-0-
