Вальфовіч: Беларусь робіць стаўку на стварэнне сучасных узораў узбраення і тэхнікі

 

7 лютага, Мінск /Кар. БЕЛТА/. Беларусь робіць стаўку на стварэнне сваіх сучасных узораў узбраення і тэхнікі. Аб гэтым журналістам заявіў дзяржаўны сакратар Савета бяспекі Беларусі Аляксандр Вальфовіч перад пачаткам пасяджэння калегіі ведамства ў Мінску, перадае карэспандэнт БЕЛТА.

"Зыходзячы з той геапалітычнай і ваенна-палітычнай абстаноўкі, якая сёння складваецца не толькі вакол нашай краіны, але і ў свеце, мы бачым, што калектыўны Захад робіць стаўку на пытанні мілітарызацыі. Палітычныя і эканамічныя санкцыі не даюць тых вынікаў, на якія разлічвалі нашы суседзі. Таму пытанні, звязаныя з мілітарызацыяй, павелічэннем ваенных бюджэтаў, імі прыняты ўжо. Мы бачым, што заключаюцца кантракты на пастаўку сучасных, перш за ўсё амерыканскіх, узораў ваеннай тэхнікі ў склад узброеных сіл Польшчы, краін Прыбалтыкі. З-за гэтага з'яўляюцца новыя рызыкі ўзнікнення ваеннай небяспекі, перш за ўсё ў адносінах да нашай краіны", - сказаў Аляксандр Вальфовіч.
Для таго, каб засцерагчы ад небяспекі Беларусь, адзначыў ён, прыняць усе меры стратэгічнага стрымлівання, нашы Узброеныя Сілы павінны адпавядаць сучасным патрабаванням і стандартам, быць забяспечанымі самымі сучаснымі ўзорамі ўзбраення і ваеннай тэхнікі. "Ва ўмовах санкцый набыць амерыканскую або нейкую іншую зброю нам і немагчыма, і вельмі дорага. Таму стаўка робіцца на свае прадпрыемствы, на стварэнне сваіх сучасных узораў са стапрацэнтнай лакалізацыяй", - падкрэсліў дзяржаўны сакратар.

Аляксандр Вальфовіч указаў на тое, што практычна ўсе ўзоры ўзбраення і тэхнікі, прадстаўленыя на выстаўцы мерапрыемства, зроблены з камплектуючых беларускай і расійскай вытворчасці. "Усё гэта паступіць у нашы Узброеныя Сілы, што істотна падніме іх баявы патэнцыял. Так, у нас кампактныя Узброеныя Сілы, але аснашчаныя сучаснымі ўзорамі ўзбраення, ваеннай тэхнікі беларускай вытворчасці, якія вядомы і за межамі нашай краіны", - рэзюмаваў ён.