6 снежня, Масква /Эдуард Півавар - БЕЛТА/. Пасяджэнне Ваеннага камітэта па пытаннях развіцця ваеннага супрацоўніцтва дзяржаў - членаў Арганізацыі Дагавора аб калектыўнай бяспецы адбудзецца 8 снежня ў рэжыме відэаканферэнцыі, паведамілі БЕЛТА ў прэс-службе Аб'яднанага штаба АДКБ.
"Будуць абмяркоўвацца выклікі і пагрозы ваеннай бяспецы ва Усходне-Еўрапейскім, Каўказскім і Цэнтральна-Азіяцкім рэгіёнах калектыўнай бяспекі, а таксама пытанні далейшага развіцця Калектыўных авіяцыйных сіл і арганізацыі проціпаветранага прыкрыцця кааліцыйных груповак войскаў пры іх разгортванні і прымяненні ў рэгіёнах калектыўнай бяспекі", - расказалі ў прэс-службе.
Члены Ваеннага камітэта будуць праінфармаваны аб прыярытэтных напрамках дзейнасці АДКБ у ваеннай сферы, прапанаваных Арменіяй у перыяд старшынства ў арганізацыі ў 2022 годзе, аб дзяржаўных органах Кыргызстана, якія дзейнічаюць у сферы забеспячэння абароны, аб ходзе работы па прыцягненні міратворчага патэнцыялу АДКБ да міратворчай дзейнасці ААН і аб падрыхтоўцы Міхайлаўскай ваеннай артылерыйскай акадэміяй (г. Санкт-Пецярбург) ваенных кадраў для дзяржаў - членаў АДКБ па спецыяльнасцях ракетных войскаў і артылерыі.
Мерапрыемства пройдзе пад кіраўніцтвам старшыні Ваеннага камітэта, начальніка Генеральнага штаба Узброеных Сіл Расіі - першага намесніка міністра абароны РФ генерала арміі Валерыя Герасімава. У ім прымуць удзел начальнікі генеральных штабоў узброеных сіл Беларусі, Арменіі, Казахстана, Кыргызстана, Таджыкістана, начальнік Аб'яднанага штаба АДКБ генерал-палкоўнік Анатоль Сідараў і намеснік генеральнага сакратара АДКБ Тахір Хайрулоеў.-0-
