31 жніўня 2024, 18:17

Ваенна-гістарычную рэканструкцыю вызвалення Івацэвіцкага раёна паказалі гасцям Дня беларускага пісьменства

31 жніўня, Івацэвічы /Кар. БЕЛТА/. Ваенна-гістарычную рэканструкцыю паказалі гасцям XXXI Дня беларускага пісьменства ў Івацэвічах, перадае карэспандэнт БЕЛТА.

У скверы Перамогі адбылося ўскладанне кветак да помніка воіна на брацкай магіле, а таксама памятнага знака спаленым вёскам. У цырымоніі прынялі ўдзел намеснік прэм'ер-міністра Ігар Петрышэнка, мітрапаліт Мінскі і Заслаўскі Веніямін, Патрыяршы Экзарх усяе Беларусі, старшыня Брэсцкага аблвыканкама Пётр Пархомчык, прадстаўнікі органаў кіравання, грамадскіх арганізацый, дэпутаты, дыпламаты. Прысутныя мінутай маўчання ўшанавалі памяць абаронцаў і мірных ахвяр вайны.

Ваенна-гістарычныя рэканструктары ўзнавілі некалькі эпізодаў вызвалення Івацэвіч і раёна ад нямецка-фашысцкіх захопнікаў у 1944 годзе. Для паўнаты перадачы атмасферы выкарыстоўвалі рарытэтную тэхніку, зброю і піратэхніку.

"Год юбілейны - 80-годдзе вызвалення Беларусі ад нямецка-фашысцкіх захопнікаў. Наш Івацэвіцкі раён - партызанскі край. Тут у гады вайны знаходзілася сэрца партызанскага руху Брэстчыны, друкавалася падпольная газета "Заря", сямейны лагер знаходзіўся, лясная школа была. На нашай зямлі адбываліся такія падзеі, якія не адлюстраваць у Дзень беларускага пісьменства было немагчыма", - падкрэсліла дырэктар Івацэвіцкага гісторыка-краязнаўчага музея Раіса Горбач.

"Цікава, што на Брэстчыне ўтварыліся першыя лясныя школы, у глыбокім тыле ў фашыстаў. Усе разумелі, што, нягледзячы на цяжкія ўмовы, дзецям трэба атрымліваць веды. Хлопчыкі і дзяўчаты, якія вучыліся ў лясной школе, а потым селі за парты ў верасні 1944 года, не засталіся на другі год. Уявіце, якія веды ім давалі ў лясной школе пры недахопе сшыткаў, ручак, алоўкаў, кніг. У голадзе і холадзе дзеці вучыліся, і вельмі добра вучыліся. Было сказана, што гэта іх баявое заданне, як іх родных і блізкіх, якія знішчалі фашыстаў, набліжаючы Перамогу", - расказала Раіса Горбач.

Дарэчы, у Івацэвічах да Дня беларускага пісьменства ўстанавілі кампазіцыю "Дзеці лясной школы". Яна ўяўляе сабой чытаючых хлопчыка і дзяўчынку з партызанскага атрада. Скульптура будзе звяртаць увагу дзяцей, што нават у цяжкія часы іх равеснікі прадаўжалі цягнуцца да ведаў.-0-