Вадзіцелям з 25 жніўня па 5 верасня трэба будзе ездзіць з уключанымі фарамі

22 жніўня, Мінск /Кар. БЕЛТА/. У сувязі з пачаткам навучальнага года ў Беларусі з 25 жніўня па 5 верасня пройдзе спецыяльнае комплекснае мерапрыемства "Увага - дзеці!". Аб гэтым БЕЛТА паведамілі ў МУС.

Мэтай мерапрыемства з'яўляецца папярэджанне дарожна-транспартных здарэнняў з удзелам дзяцей, павышэнне пільнасці вадзіцеляў і бацькоў. У гэты перыяд рух транспартных сродкаў у светлы час сутак павінен ажыццяўляцца з уключаным блізкім святлом фар.

Супрацоўнікі ДАІ правядуць як прафілактычныя акцыі для дзяцей і бацькоў, так і рэйдавыя мерапрыемствы па спыненні парушэнняў правіл дарожнага руху. Будуць звяртаць увагу на захаванне ўстаноўленай скорасці, правіл бяспечнай перавозкі дзяцей і праезду пешаходных пераходаў. На асаблівым кантролі ў Дзяржаўтаінспекцыі - стварэнне бяспечных умоў для перамяшчэння дзяцей па маршруце "дом - школа - дом".

За сем месяцаў бягучага года на дарогах краіны загінулі 17 непаўналетніх, 253 дзіцяці траўміраваны. З ліку загінулых непаўналетніх 11 былі пасажырамі, чацвёра - пешаходамі, двое - вадзіцелямі.

У МУС нагадалі, што дарослым трэба праяўляць пастаянную ўвагу да дзяцей і іх бяспекі, стаць станоўчым прыкладам выканання правіл дарожнага руху. "Помніце, што 77 працэнтаў ДТЗ з удзелам дзяцей учыняюцца па віне дарослых", - дадалі ў ведамстве.-0-