22 верасня, Мінск /Кар. БЕЛТА/. Падрыхтоўка адзінага дня галасавання ідзе планава, заявіў журналістам старшыня ЦВК Ігар Карпенка, паведамляе карэспандэнт БЕЛТА.
"У адпаведнасці са змяненнямі і дапаўненнямі ў Выбарчы кодэкс, якія мы ўнеслі па выніках канстытуцыйнага рэферэндуму, некаторыя выбарчыя працэдуры вынесены за межы самой выбарчай кампаніі, якая пачнецца пасля падпісання ўказа кіраўніка дзяржавы. Ён павінен выйсці не пазней за 23 лістапада бягучага года, - расказаў Ігар Карпенка. - Як вы ведаеце, адзіны дзень галасавання ў адпаведнасці з Канстытуцыяй прыпадае на апошнюю нядзелю лютага. Такім чынам, у 2024 годзе гэта будзе 25 лютага. Мы правялі пасяджэнне ЦВК, дзе ўстанавілі сярэднюю колькасць выбаршчыкаў на выбарчую акругу па выбарах дэпутатаў Палаты прадстаўнікоў Нацыянальнага сходу восьмага склікання. 27 верасня на пасяджэнні ЦВК вызначым акругі па выбарах дэпутатаў Палаты прадстаўнікоў. Гэта норма закладзена ў выбарчым кодэксе, дзе вызначаецца, што мы гэта павінны зрабіць не пазней за 1 кастрычніка".
Да 1 лістапада будуць сфарміраваны акругі па выбарах дэпутатаў мясцовых Саветаў дэпутатаў. "Пасля выхаду ўказа кіраўніка дзяржавы пачнуцца ўсе працэдурныя пытанні, звязаныя з вылучэннем складу тэрытарыяльных, акруговых, участковых выбарчых камісій. Пачнецца працэс вылучэння кандыдатаў у дэпутаты, - адзначыў кіраўнік ЦВК. - Такім чынам будзем рухацца да адзінага дня галасавання, калі выберам увесь дэпутацкі корпус. У агульнай колькасці мы будзем выбіраць каля 12,6 тыс. дэпутатаў, пачынаючы ад сельскіх пасялковых Саветаў, заканчваючы дэпутатамі Палаты прадстаўнікоў".
"Пасля адзінага дня галасавання неабходна будзе выбраць членаў Савета Рэспублікі і дэлегатаў Усебеларускага народнага сходу. Такім чынам, можам сказаць, што электаральны цыкл, які пачаўся, завершыцца толькі ў канцы красавіка. Таму што ў адпаведнасці з Канстытуцыяй не пазней за 25 красавіка павінна прайсці першае пасяджэнне Усебеларускага народнага сходу, - дадаў Ігар Карпенка. - Вось такая нас чакае сур'ёзная работа, і ўсё пакуль ідзе планава. Мы дзейнічаем у адпаведнасці з тым графікам, які вызначылі. Адразу пасля падпісання ўказа будуць раздрукаваны каляндарныя планы, і ўсе суб'екты, якія задзейнічаны ў арганізацыі выбараў, будуць далей актыўна працаваць".
Сёння Ігар Карпенка сустрэўся з грамадскім актывам Мазырскага і Калінкавіцкага раёнаў. У рабочым графіку кіраўніка ЦВК запланавана наведванне сярэдняй школы нумар 16, дзе ён азнаёміцца з умовамі і арганізацыяй навучальнага працэсу, а таксама наведванне Мазырскага дзяржаўнага педагагічнага ўніверсітэта, дзе пройдзе сустрэча са студэнтамі і выкладчыкамі.-0-
