2 чэрвеня, Мінск /Кар. БЕЛТА/. Урад устанавіў парадак арганізацыі харчавання педагагічных і іншых работнікаў устаноў адукацыі. Гэта прадугледжана пастановай Савета Міністраў нумар 356 ад 31 мая 2023 года, якая афіцыйна апублікавана на Нацыянальным прававым інтэрнэт-партале, паведамляе БЕЛТА.
Вызначаны парадак арганізацыі харчавання педагагічных і іншых работнікаў устаноў дашкольнай адукацыі, агульнай сярэдняй адукацыі (акрамя вучылішчаў алімпійскага рэзерву), спецыяльных дзіцячых садоў, спецыяльных школ, спецыяльных школ-інтэрнатаў, цэнтраў карэкцыйна-развіваючага навучання і рэабілітацыі, спецыяльных вучэбна-выхаваўчых і спецыяльных лячэбна-выхаваўчых устаноў, што фінансуюцца з рэспубліканскага або мясцовых бюджэтаў.
Гэтым жа дакументам вызначаны парадак планавання расходаў рэспубліканскага або мясцовых бюджэтаў на адпаведныя мэты, а таксама памер і парадак спагнання платы за харчаванне.
Як растлумачылі ў Міністэрстве адукацыі, работнікам устаноў адукацыі прадастаўляецца аднаразовае харчаванне па іх жаданні за плату. Абслугоўванне будзе магчыма ў форме папярэдняга заказу ў адпаведнасці з прыкладнымі двухтыднёвымі рацыёнамі харчавання, якія распрацоўваюцца для харчавання вучняў старэйшай узроставай групы адпаведнага тыпу і віду ўстановы адукацыі.
Адзначаецца, што з работнікаў устаноў адукацыі плату за харчаванне будуць спаганяць у памеры 100 працэнтаў ад дзеючых грашовых норм расходаў на харчаванне ў дзень на аднаго вучня старэйшай узроставай групы адпаведнага тыпу і віду ўстановы адукацыі з улікам павышаючага каэфіцыента ў тым выпадку, калі гэта прадугледжана заканадаўствам ў сферы арганізацыі харчавання ва ўстановах адукацыі.
Пры гэтым дні, калі работнікі не атрымлівалі харчавання, не ўлічваюцца пры разліку платы за харчаванне.
Плаціць за фактычна прадастаўленае харчаванне неабходна кожны месяц не пазней за 25-е чысло бягучага месяца на разліковыя банкаўскія рахункі па ўліку бюджэтных і іншых дзяржаўных сродкаў арганізацый, якія вызначаюцца заснавальнікамі ўстаноў адукацыі і (або) абласнымі (Мінскім гарадскім) выканкамамі ў адпаведнасці з бюджэтным заканадаўствам.
Па пісьмовай заяве работніка ўстановы адукацыі плата за харчаванне ўтрымліваецца наймальнікам з зарплаты работніка.
Міністэрству фінансаў даручана прадугледжваць у рэспубліканскім бюджэце сродкі на арганізацыю харчавання работнікаў устаноў адукацыі, фінансуемых з рэспубліканскага бюджэту.
Аблвыканкамам і Мінскаму гарвыканкаму рэкамендавана прадугледжваць у мясцовых бюджэтах сродкі на рэалізацыю гэтага дакумента.-0-
