31 жніўня 2024, 15:14

Унікальную гістарычную экспазіцыю прадставілі ў павільёне БЕЛТА ў Івацэвічах

31 жніўня, Івацэвічы /Кар. БЕЛТА/. У Івацэвічах у час святкавання XXXI Дня беларускага пісьменства БЕЛТА прадстаўляе ўнікальную экспазіцыю знаходак, зробленых 52-м асобным спецыялізаваным пошукавым батальёнам Міністэрства абароны Беларусі ў час раскопак, перадае карэспандэнт БЕЛТА.

"Наша экспазіцыя прысвечана 80-годдзю вызвалення Беларусі ад нямецка-фашысцкіх захопнікаў. БЕЛТА пры дапамозе 52-га асобнага пошукавага батальёна Міністэрства абароны Беларусі і з дапамогай Нацыянальнага архіва падрыхтавала ўнікальную экспазіцыю на Дзень беларускага пісьменства", - адзначыў першы намеснік генеральнага дырэктара БЕЛТА Васіль Мацвееў.

У павільёне прадстаўлены знаходкі, зробленыя ў час раскопак байцамі пошукавага батальёна. Сярод іх легендарны кулямёт Максіма, каскі савецкіх салдат, аўтамат ПКШ, вінтоўкі Мосіна, пісталеты і гранаты часоў Другой сусветнай вайны.

Асаблівую сімвалічную каштоўнасць маюць два экспанаты. Першы - шкляная біклажка, у якой з 1941 года захоўваецца вада. На думку Васіля Мацвеева, яна сімвалізуе пачатак тых страшных для нашай зямлі падзей. Другі значны экспанат - стальны нагруднік, які надзявалі штурмавікі савецкай арміі. Уладальнік прадстаўленай у павільёне брані загінуў у баях у 1944 годзе. Першы намеснік генеральнага дырэктара БЕЛТА лічыць, што гэта сімвалізуе тое, з якой цяжкасцю даваліся вызваленне Беларусі і Перамога.

"З дапамогай Нацыянальнага архіва мы таксама прывезлі ўнікальныя дакументы. У нас у павільёне прадстаўлены шыфраграмы Беларускага штаба партызанскага руху. Тут ёсць шыфраграмы аб пачатку рэйкавай вайны ў Беларусі, аб падрыве эшалонаў. Таксама мы прывезлі насценгазеты, якія выдаваліся ў беларускіх партызанскіх атрадах. Тут таксама ёсць малюнкі, якія стваралі партызаны на працягу вайны", - расказаў Васіль Мацвееў.

Для ўсіх жадаючых правядуць экскурсію. "Мне здаецца гэта вельмі важным. Моладзь павінна памятаць і перадаваць гэтыя веды, наш код, гістарычную памяць, сваім дзецям. Для гэтага ўсё і робіцца", - дадаў Васіль Мацвееў.

Таксама ў павільёне прадстаўлена вялікая экспазіцыя кніг выдавецтва БЕЛТА. Сярод прадстаўленых экзэмпляраў - "Апошнія сведкі" і "Архівы. Нічога, акрамя праўды", якія расказваюць аб генацыдзе беларускага народа.

Таксама ў павільёне БЕЛТА выступіў беларускі асілак Вячаслаў Харанека з майстар-класам па гіравым спорце. Ён выканаў жым гіры вагой 24 кг па 80 разоў кожнай рукой за 136 секунд. Пасля спартсмен правёў конкурс з гледачамі. Усім жадаючым прапаноўвалася паспрабаваць жым гіры вагой 16 кг. Усе ўдзельнікі атрымалі імянныя медалі Вячаслава Харанекі з яго аўтографам.

У праграме работы павільёна была і сустрэча з вядомай беларускай дзіцячай пісьменніцай Кацярынай Хадасевіч-Лісавай - лаўрэатам беларускай Нацыянальнай літаратурнай прэміі. У час сустрэчы са школьнікамі аўтар расказала аб сваіх новых кнігах, падзялілася падрабязнасцямі свайго творчага шляху і правяла аўтограф-сесію.

На 18.00 у павільёне запланавана сустрэча са спеваком і кампазітарам Валерыем Шматам, мастацкім кіраўніком арт-групы "Беларусы".

"Наш павільён карыстаецца вельмі вялікай папулярнасцю. З 9 гадзін, як мы выставілі нашу экспазіцыю, падыходзяць сем'і, ветэраны, дзеці. Мне здаецца, мы трапілі гэтай экспазіцыяй у самую кропку. Мы расказалі людзям тое, што трэба расказаць у гэты знакавы для Беларусі год васьмідзесяцігоддзя вызвалення", - адзначыў Васіль Мацвееў.

Павільён БЕЛТА будзе працаваць і заўтра.-0-