8 снежня, Мінск /Кар. БЕЛТА/. Уладзімір Макарэвіч нарадзіўся і вырас у вёсцы Высоцк Дубровіцкага раёна Ровенскай вобласці. Гэта недалёка ад Беларусі. Прыкладна 15 гадоў таму прыехаў будаўніком у нашу краіну на заработкі. Спачатку кожныя тры месяцы вяртаўся дадому, каб падаўжаць рабочую візу. А на чацвёрты год вырашыў: пара асесці ў Беларусі.
Тым больш працоўнае месца ў гаспадарцы Шылавічы - механізатарам - для яго ўжо было, а за прылаўкам мясцовага магазіна працавала Алена, у якую Уладзімір закахаўся з першага погляду. Цяпер яны - сям'я. Заканчваюць рамонт у вялікім доме, дзе мараць сустрэць Новы год. У 2023-і Уладзімір увойдзе ў новым статусе - грамадзянінам Рэспублікі Беларусь.
Уладзімір Макарэвіч - герой новага выпуску праекта "Цяпер мы беларусы". Кожны тыдзень у газеце "7 дней" і на сайце БЕЛТА мы будзем расказваць гісторыі людзей, якія ехалі пачынаць усё з нуля ў чужой краіне, а ў выніку назвалі яе сваім домам. Нашы героі гатовы шчыра расказаць, чаму вырашылі аспрэчыць крылатую фразу "Радзіму не выбіраюць". Дзе б яны ні з'явіліся на свет, цяпер яны - беларусы.
Праект створаны за кошт сродкаў мэтавага збору на вытворчасць нацыянальнага кантэнту.-0-
