Улады акажуць падтрымку прадпрыемствам у будаўніцтве арэнднага жылля для работнікаў

19 жніўня, Мінск /Кар. БЕЛТА/. Улады акажуць падтрымку прадпрыемствам у будаўніцтве арэнднага жылля для работнікаў. Аб гэтым расказаў журналістам міністр архітэктуры і будаўніцтва Руслан Пархамовіч па выніках нарады кіраўніка дзяржавы з кіраўніцтвам Савета Міністраў, перадае карэспандэнт БЕЛТА.

"Мы абмеркавалі пытанні падтрымкі юрыдычных асоб пры будаўніцтве арэнднага жылля для сваіх работнікаў. Яны будуць мець пэўныя прэферэнцыі: ім будзе пагашацца практычна палова ад стаўкі таго крэдыту, які яны будуць браць для таго, каб у далейшым прадастаўляць арэнднае жыллё сваім работнікам", - расказаў Руслан Пархамовіч.

Пры гэтым, паводле яго слоў, не менш як 20 працэнтаў такога жылля ў першачарговым парадку неабходна будзе прадастаўляць маладым спецыялістам.

Мінбудархітэктуры таксама прапануе істотна спрасціць падыходы па падключэнні індывідуальнага жылля да інжынерных камунікацый. Гэта значыць, юрыдычнай або фізічнай асобе неабходна будзе толькі прынесці заяву ў эксплуатуючую арганізацыю і аплаціць прадастаўленыя паслугі. У далейшым яны будуць вызваляцца ад іншых працэдур: праектавання, збору тэхумоў, афармлення дакументаў. "Усе пытанні будзе вырашаць эксплуатуючая арганізацыя. Усё ж такі адказваць за інжынерныя сеткі павінны тыя, хто ў далейшым іх эксплуатуе", - сказаў міністр.-0-