21 сакавіка, Мінск /Кар. БЕЛТА/. Начальнік упраўлення арганізацыі продажаў дзяржаўнага прадпрыемства "Стравіта" Анжэла Забаронак расказала ў прэс-цэнтры БЕЛТА, як стаць удзельнікам праграмы накапленняў на другую пенсію.
"Неабходна звярнуцца ў страхавую кампанію "Стравіта", - сказала Анжэла Забаронак. - Мы прадастаўляем грамадзянам шырокі спектр варыянтаў заключэння дагавора страхавання. Можна прыйсці непасрэдна да нас у офіс, можна запрасіць нашага прадстаўніка, а можна заключыць дагавор страхавання анлайн на сайце. Акрамя таго, мы арганізуем рабочыя месцы ў арганізацыях і на прадпрыемствах".
Для заключэння дагавора страхавання неабходна пры сабе мець пашпарт і ведаць дакладную назву сваёй кампаніі, дадала начальнік упраўлення. "Мы часам сутыкаемся з пытаннем, калі грамадзяне не могуць назваць найменне юрыдычнай асобы, дзе працуюць, - растлумачыла яна. - Пры заключэнні дагавора мы дапамагаем аформіць заяву на страхаванне. У заяве вызначаюцца асноўныя параметры дагавора. Грамадзяніну прапануецца выбраць тарыф, па якім ён будзе адлічваць сродкі па праграме страхавання, і выбраць перыяд выплаты дадатковай пенсіі, які можа складаць 5 або 10 гадоў. Заява афармляецца на папяровым носьбіце або праз асабісты кабінет кліента. На аснове заявы прадстаўнік кампаніі афармляе дагавор страхавання".
Ніякай платы пры заключэнні дагавора страхавання не спаганяецца, а проста ідзе фіксацыя ўсіх умоў дагавора, падкрэсліла спецыяліст.
Пасля гэтага, грамадзянін з дагаворам ідзе да работадаўца. "Неабходна ўзяць з сабой дагавор, напісаць заяву работадаўцу на ўтрыманне страхавых узносаў і пералічэнне іх у страхавую кампанію "Стравіта". Адначасова ў гэтай жа заяве грамадзянін указвае работадаўцу на неабходнасць прадастаўлення яму сацыяльнага падатковага выліку. Пасля гэтага работадавец абавязаны прыняць дакумент і пачаць пералічэнне страхавых узносаў на карысць работніка, тым самым пачаць фарміраваць будучую пенсію. Істотнага адрознення ў падачы заяў анлайн або вочна ў офісе прадпрыемства няма", - растлумачыла Анжэла Забаронак.-0-
