ДЗЯРЖОРГАНЫДЗЯРЖОРГАНЫ
Панядзелак, 13 ліпеня 2020
Мінск Малавоблачна +14°C
Усе навіны
Усе навіны
Грамадства
28 мая 2020, 18:27

У новую рэдакцыю закона аб турызме ўключылі фінансавую адказнасць тураператараў і ліцэнзаванне гідаў

Фота з архіва
Фота з архіва

28 мая, Мінск /Кар. БЕЛТА/. Дэпутаты рыхтуюць да першага чытання праект новай рэдакцыі закона аб турызме. У ліку навацый - увядзенне інстытута фінансавай адказнасці тураператараў і абавязковага ліцэнзавання гідаў. Аб гэтым карэспандэнту БЕЛТА паведаміў член Пастаяннай камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Павел Міхалюк.

Распрацоўшчыкі законапраекта прапануюць некалькі варыянтаў таго, як можа быць рэалізавана ініцыятыва з увядзеннем інстытута фінансавай адказнасці тураператара. "Гэта дагавор страхавання грамадзянскай адказнасці, банкаўскія гарантыі, фонд персанальнай адказнасці", - растлумачыў Павел Міхалюк.

Прапануецца таксама размежаваць адказнасць турагентаў і тураператараў перад кліентамі. Для гэтага ў законапраекце ўдакладняюцца адпаведныя тэрміны і ўводзяцца новыя для больш дакладнай фармулёўкі і вызначэння іх функцый. Змяненні ўносіліся з улікам замежнага вопыту.

"Тураператар павінен несці адказнасць за якасць паслуг, якія ўключаны ў сфарміраваныя ім туры, сам ён іх рэалізуе або праз сетку турагентаў. Згодна з законапраектам, прэтэнзіі кліентаў накіроўваюцца менавіта яму. Такім чынам, сітуацый, калі турагент адказвае за няправільна сфарміраваны тур, не будзе", - адзначыў дэпутат.

Сярод новаўвядзенняў законапраекта таксама ўвядзенне ліцэнзавання дзейнасці экскурсаводаў і гідаў-перакладчыкаў. "Па новай рэдакцыі закона яны не маюць права працаваць без ліцэнзіі. Для таго каб яе атрымаць трэба будзе прайсці атэстацыю", - сказаў Павел Міхалюк.

Шэраг новаўвядзенняў датычыцца заключэння дагавора аказання турыстычных паслуг і накіраваны на дадатковую абарону правоў спажыўцоў. "На практыцы суб'екты турыстычнай дзейнасці пры складанні дагавора вызначаюць парадак, калі яны бяруць грошы толькі за агенцкія паслугі. Асноўны ж кошт уносіцца або тураператару, або прымаючаму боку. Гэта акалічнасць ушчамляе правы спажыўцоў. У выпадку спрэчкі аб якасці паслуг узнікаюць складанасці з тым, каб даказаць факт аплаты", - канстатаваў парламентарый. Таму ў праекце закона прадугледзелі, што турыст плаціць суб'екту гаспадарання, які па дагаворы выступае выканаўцам, або турагенту, сума прапісваецца адразу.

Праект закона прадугледжвае таксама дадатковыя магчымасці для заключэння дагавора турыстычных паслуг. "Пляцоўкай для гэтага можа служыць сайт тураператара або турагента. Чалавек можа запоўніць электронную форму. Пры заключэнні дагавора турысту павінна быць выдадзена пацвярджэнне з інфармацыйнай сістэмы з тэкстам дагавора", - расказаў парламентарый. Акрамя таго, плануецца, што ў дагаворы будуць абавязкова прапісваць інфармацыю аб фінансавай адказнасці тураператара перад кліентамі - як пацвярджэнне таго, што ў выпадку форс-мажору яны змогуць вярнуць грошы.

Плануецца, што новая рэдакцыя закона аб турызме будзе разглядацца на асенняй сесіі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі