7 жніўня, Мінск /Кар. БЕЛТА/. У МУС расказалі, як не стаць ахвярай вішынгу і распазнаць тэлефоннага аферыста. Такая інфармацыя размешчана на сайце ведамства, паведамляе БЕЛТА.
Жыхарам Беларусі прадаўжаюць паступаць званкі ад махляроў, якія пад выглядам банкаўскіх работнікаў спрабуюць даведацца аб персанальных даных ахвяр, каб выкрасці грошы з іх рахункаў. Размова ідзе аб так званым вішынгу - адным з відаў махлярства з выкарыстаннем сацыяльнай інжынерыі. Прадстаўляючыся супрацоўнікамі кантакт-цэнтра або спецыялістамі па бяспецы банкаў, зламыснікі звоняць кліентам такіх устаноў. Яны паведамляюць аб учыненым адносна іх махлярстве і пад рознымі прычынамі просяць прадаставіць рэквізіты плацежных картак. А атрымаўшы неабходныя даныя - выкрадаюць грошы.
"У час званка яны могуць паведаміць, што адносна рахунку кліента адбываюцца махлярскія дзеянні. Каб не дапусціць пераводу сродкаў або іх зняцця ў банкамаце, запытваюць даныя БПК і іншыя персанальныя звесткі. Сярод распаўсюджаных сцэнарыяў аферыстаў - паведамленне ад імя банка аб нібыта памылкова аформленай заяўцы на крэдыт, залічэнні перавода або спісанні грошай з рахунку", - расказалі ва ўпраўленні "К" МУС.
Барацьбіты з кіберзлачыннасцю звяртаюць увагу, што зламыснікі нярэдка выкарыстоўваюць праграмы-ананімайзеры. У такім выпадку нумары тэлефонаў, з якіх ажыццяўляюцца званкі, вызначаюцца як афіцыйныя, пазначаныя на сайце банка. Таксама аферысты могуць падмяніць афіцыйны нумар не поўнасцю, а толькі адну яго лічбу, і візуальна гэты падлог не такі непрыкметны. Для большай праўдападобнасці ў якасці шумавога фону ў час тэлефоннай размовы выкарыстоўваецца імітацыя гукаў працуючага кантакт-цэнтра.
Ва ўпраўленні "К" МУС адзначаюць: супрацоўнікі банка пры званку кліенту ні пры якіх абставінах не запатрабуюць рэквізіты банкаўскіх картак або іншай канфідэнцыяльнай інфармацыі. Просьба незнаёмага абанента аб прадастаўленні такіх звестак сведчыць аб тым, што размова вядзецца з махляром. У гэтым выпадку неадкладна завяршыце размову і звярніцеся ў кантакт-цэнтр банка, што эмітаваў картку, раскажыце аб сітуацыі і далей прытрымлівайцеся рэкамендацый прадстаўніка ўстановы.
Калі зламысніку ўсё ж удалося атрымаць рэквізіты БПК або быў устаноўлены факт крадзяжу грашовых сродкаў, неадкладна заблакіруйце картку (нумар тэлефона пазначаны на адвароце карткі) і звярніцеся з заявай у праваахоўныя органы. Помніце, калі крадзеж адбыўся па прычыне перадачы пацярпелым рэквізітаў сваёй БПК або даных, атрыманых у SMS, трэцім асобам, банкі могуць адмовіць у вяртанні грашовых сродкаў.
У МУС рэкамендуюць грамадзянам ні пад якой прычынай не перадаваць і не паведамляць плацежныя рэквізіты, поўны нумар карткі і тэрмін яе дзеяння, лагін і пароль да інтэрнэт-банка, іншую персанальную інфармацыю. "Не пачынайце перагаворы з незнаёмцам. Пакладзіце трубку і самастойна звярніцеся ў банк па нумарах, пазначаных на афіцыйным сайце. Прымяняйце ўсе даступныя спосабы засцярогі, прапанаваныя банкамі (двухфактарную аўтарызацыю, смс-апавяшчэнне аб расходных аперацыях, ліміт зняцця грашовых сродкаў). Выкарыстоўвайце складаныя паролі доступу да ўліковых запісаў электроннай пошты, да сістэм "інтэрнэт-банкінг", сацыяльных сетак і іншых інтэрнэт-сэрвісаў. Не адкрывайце электронныя паштовыя паведамленні, атрыманыя ад невядомых адпраўшчыкаў і не запускайце іх змест. Не пераходзьце па невядомых спасылках і не наведвайце інтэрнэт-рэсурсы сумніўнага зместу. Пры наведванні інтэрнэт-сайтаў звяртайце ўвагу на вэб-адрас інтэрнэт-рэсурсу", - адзначылі ў ведамстве.
У выпадку страты або крадзяжу карткі неабходна неадкладна заблакіраваць яе па тэлефоне або звярнуцца ў банк. Ні пад якой прычынай не трэба адпраўляць рэквізіты карткі, фотавыявы па інтэрнэце, не паведамляць даныя, атрыманыя ў выглядзе SMS-паведамленняў: сеансавыя паролі, код аўтарызацыі, пароль "3-D Seсure". Пры выяўленні несанкцыянаванага спісання грашовых сродкаў з карт-рахунку неадкладна неабходна звярнуцца з заявай у банк для іх вяртання па прынцыпе "нулявой адказнасці".-0-
