Мабільная версія
ДЗЯРЖОРГАНЫ

Апошнія навіны
Усе навіны

ХХІІІ Міжнародная спецыялізаваная выстаўка "СМІ ў Беларусі" адкрылася ў Мінску

Грамадства 02.05.2019 | 10:11
У час цырымоніі адкрыцця
У час цырымоніі адкрыцця

2 мая, Мінск /Кар. БЕЛТА/. Сёння ў Мінску пачала работу ХХІІІ Міжнародная спецыялізаваная выстаўка "СМІ ў Беларусі", паведамляе БЕЛТА.

На выстаўцы прадстаўлена больш за 50 экспанентаў. Шырока паказаны друкаваныя і электронныя СМІ, а таксама сеткавыя выданні, якія пачалі рэгістравацца ў нашай краіне згодна з новаўвядзеннем ў заканадаўства з 1 снежня 2018 года.

Як расказалі ў Міністэрстве інфармацыі, наведвальнікам форуму будзе прапанавана насычаная праграма мерапрыемстваў, якая складаецца з прэзентацый інфармацыйных і інтэрнэт-праектаў, аўтограф-сесій, майстар-класаў. Кіраўнікі сродкаў масавай інфармацыі і журналісты, прадстаўнікі экспертнай супольнасці абмяркуюць значныя пытанні функцыянавання медыясферы, ролі СМІ ў развіцці грамадства і дзяржавы ў рамках дзелавой праграмы. Шэраг мерапрыемстваў будзе прысвечаны рэгіянальным сродкам масавай інфармацыі, якія раскажуць аб удзеле ў сацыяльна-эканамічным развіцці сваіх рэгіёнаў. Адбудзецца прэзентацыя спартыўных выданняў.

Вялікае месца ў праграме выстаўкі адведзена праектам БЕЛТА, прэс-службаў і камунікацыйных агенцтваў. У прыватнасці, Беларускае тэлеграфнае агенцтва прадставіць на форуме ўнікальныя кадры фотаархіва 1941-1944 гадоў, азнаёміць з партызанскімі часопісамі і прапануе наведвальнікам пакаштаваць партызанскай кашы. Стэнд БЕЛТА таксама прэзентуе традыцыі суверэннай Беларусі, стане пляцоўкай для сустрэчы са спартсменамі і ўстанаўлення новага рэкорду.

На асобным стэндзе, падрыхтаваным з дапамогай Упаўнаважанага па справах рэлігій і нацыянальнасцей, будуць экспанавацца СМІ дыяспар. Будуць прадстаўлены краіны Балтыі, Украіна, Расія. Прыедзе таксама дэлегацыя з Узбекістана. Пасольства Кітая ў Беларусі пазнаёміць гасцей выстаўкі з кітайскімі СМІ. Акрамя таго, у дзень адкрыцця выстаўкі адбудзецца цырымонія ўзнагароджвання пераможцаў конкурсу за лепшае асвятленне пытанняў міжнацыянальных і міжканфесійных адносін, міжкультурнага дыялогу ў Беларусі і супрацоўніцтва з суайчыннікамі за мяжой.

Сярод іншых асаблівасцей цяперашняга форуму - правядзенне 3 мая першага тэматычнага Дня піяру, а таксама шырокая прэзентацыя сеткавых СМІ, сярод якіх інтэрнэт-выданне Мediana.by, заснаванае сумесна з факультэтам журналістыкі БДУ, Міністэрствам інфармацыі і Грамадскім прэс-цэнтрам Дома прэсы.

Традыцыйна ў рамках выстаўкі 3 мая на пляцоўцы "Дыпсэрвіс хол" (зав. Вайсковы, 4) будуць уручаны ўзнагароды пераможцам у 23 намінацыях Нацыянальнага конкурсу друкаваных СМІ "Залатая літара" - у гэтым годзе на ўдзел у ім паступіла больш за 330 заявак.

4 мая на "СМІ ў Беларусі" - дзіцячы дзень. Упершыню выстаўка будзе прадстаўлена вачамі самых юных яе ўдзельнікаў - дзяцей. Плануецца падрыхтоўка спецыяльных рэпартажаў аб выстаўцы юнымі журналістамі.

Сярод удзельнікаў выстаўкі таксама аператары і дыстрыб'ютары кабельнага тэлебачання, распаўсюджвальнікі друкаванай прадукцыі, выдавецтвы. Так, на стэндзе РУП "Белсаюздрук" пройдуць прэзентацыі кніг і аўтограф-сесіі, інтэрв'ю і майстар-клас па лепцы з кінетычнага пяску, конкурс дзіцячага малюнка, квэст, прысвечаны Вялікай Айчыннай вайне. Будзе працаваць інтэрактыўная фотазона "Беларусь памятае" і зона кафэ.

Напярэдадні 75-й гадавіны вызвалення Беларусі ад нямецка-фашысцкіх захопнікаў прадпрыемства РУП "Белпошта" правядзе прома-мерапрыемства "Адпраўце вестку ветэрану Вялікай Айчыннай вайны". Наведвальнікі выстаўкі змогуць падпісаць паштовыя карткі і паштоўкі і падзякаваць за мір на роднай зямлі тым, хто падарыў доўгачаканую Перамогу. Весткі ветэранам з добрымі і цёплымі пажаданнямі супрацоўнікі прадпрыемства даставяць бясплатна ў любую кропку Беларусі.

На сваіх стэндах беларускія СМІ прадставяць праекты ў рамках рэспубліканскай акцыі "Беларусь помніць".

XXIII Міжнародная спецыялізаваная выстаўка "СМІ ў Беларусі" пройдзе з 2 па 4 мая ў адміністрацыйным комплексе па праспекце Пераможцаў, 14. Цырымонія адкрыцця адбудзецца сёння ў 12.00. Цэнтральнымі тэмамі выстаўкі стануць 75-годдзе вызвалення Беларусі ад нямецка-фашысцкіх захопнікаў, II Еўрапейскія гульні, сучасныя інтэрнэт-тэхналогіі, адраджэнне малой радзімы.

Міжнародная спецыялізаваная выстаўка "СМІ ў Беларусі" праводзіцца штогод з 1997 года Міністэрствам інфармацыі пры падтрымцы Міністэрства замежных спраў, Мінскага гарвыканкама, РУП "Нацыянальны выставачны цэнтр "БелЭкспа", іншых органаў дзяржкіравання, вядучых СМІ, грамадскіх арганізацый.-0-

Фота Максіма Гучака

Версія для друку
Навіны рубрыкі Грамадства
Топ-навіны
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Кіеў
Ліда
Мінск
Магілёў
Магілёў
Мозыр
Масква
Орша
Полацк
Рыга
Санкт-Пецярбург
Салігорск
Салігорск

Інфаграфіка

Беларусь - Казахстан: гандлёва-эканамічнае супрацоўніцтва Важным элементам двухбаковага супрацоўніцтва з'яўляецца Міжурадавая казахстанска-беларуская камісія па гандлёва-эканамічным супрацоўніцтве, якая функцыянуе з 1996 года.