ДЗЯРЖОРГАНЫДЗЯРЖОРГАНЫ
Флаг Панядзелак, 30 студзеня 2023
Мінск -1°C
Усе навіны
Усе навіны
Грамадства
01 снежня 2022, 14:01

У Мінску адкрыўся кантакт-цэнтр сацыяльных паслуг 139

1 снежня, Мінск /Кар. БЕЛТА/. На базе Мінскага гарадскога цэнтра сацыяльнага абслугоўвання сям'і і дзяцей адкрыўся кантакт-цэнтр дзяржаўных сацыяльных паслуг 139, перадае карэспандэнт БЕЛТА.

Ва ўрачыстым мерапрыемстве прыняла ўдзел міністр працы і сацыяльнай абароны Ірына Касцевіч. "Стварэнне такога кантакт-цэнтра - сапраўды вельмі добрая ініцыятыва. Мы ўбачылі вялікі запыт на гэту паслугу з боку пажылых людзей і людзей з інваліднасцю. У сваю чаргу Мінск хутка падхапіў такую ідэю і літаральна праз месяц яна ўжо рэалізавана. Думаю, такія кантакт-цэнтры павінны быць ва ўсіх рэгіёнах Беларусі. Аб іх запатрабаванасці мы даведваемся са зваротаў грамадзян. Людзі сапраўды маюць патрэбу ў такой лініі, на якую можна пазваніць і даведацца пра паслугі, якія прадастаўляюцца, атрымаць іх дома, расказаць пра сваю бяду альбо параіцца. Пажылому чалавеку патрэбна ўвага, клопат і спагадлівасць", - адзначыла міністр.

Паводле яе слоў, колькасць гэтых паслуг вымяраецца дзясяткамі. "Людзі могуць даведацца аб тым, калі будзе павышэнне пенсіі, на якую дапамогу могуць разлічваць грамадзяне з інваліднасцю і якую матэрыяльную дапамогу яны могуць атрымліваць. Так, з сённяшняга дня, 1 снежня, трэці раз у гэтым годзе мы павышаем пенсіі. Таму кантакт-цэнтр - гэта той інструмент, які дасць магчымасць аператыўна і адрасна дапамагчы кожнаму з дапамогай тэлефоннай лініі", - рэзюмавала Ірына Касцевіч.

Дзякуючы кантакт-цэнтру мінчане змогуць па адзіным нумары тэлефона аператыўна і дакладна атрымаць інфармацыю па пытаннях сацыяльнага абслугоўвання, сацыяльных гарантый і выплат, сацыяльных паслуг, у тым ліку прадастаўляемых дамамі-інтэрнатамі і тэрытарыяльнымі цэнтрамі. Акрамя таго, праз кантакт-цэнтр можна будзе аформіць заяўку на прадастаўленне сацыяльных паслуг (за выключэннем паслугі "сацыяльнае таксі"), якую перададуць у тэрытарыяльны цэнтр сацыяльнага абслугоўвання насельніцтва па месцы жыхарства грамадзяніна і ў далейшым пракантралююць яе выкананне.

Кантакт-цэнтр будзе працаваць з панядзелка па пятніцу з 8.00 да 20.00. Адзіны нумар тэлефона - 139 - для абанентаў стацыянарнай і сотавай рухомай электрасувязі ("Белтэлекам", МТС, А1, "БеСТ").-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі