Сцяг Аўторак, 18 чэрвеня 2024
Усе навіны
Усе навіны
Грамадства
28 мая 2024, 16:28

У кругласутачных лагерах Беларусі ў гэтым годзе адпачнуць на 10 тыс. дзяцей больш

28 мая, Мінск /Кар. БЕЛТА/. У Беларусі ў кругласутачных лагерах у гэтым годзе адпачнуць на 10 тыс. дзяцей больш. Аб гэтым журналістам паведаміў дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі, перадае карэспандэнт БЕЛТА.

"Аздараўленне ў лагерах розных тыпаў пройдуць не менш як 393 тыс. дзяцей. Рэспубліканскаму цэнтру выдзелена на правядзенне летняй аздараўленчай кампаніі дастаткова сродкаў, каб задаволіць усіх жадаючых і маючых патрэбу ў выздараўленні. Гэта складае больш за Br64 млн. Усяго будзе функцыянаваць каля 6 тыс. лагераў розных тыпаў: 4,5 тыс. - лагеры з дзённым знаходжаннем і каля 1,5 тыс. - лагеры з кругласутачным знаходжаннем. Акцэнт будзе рабіцца на павелічэнні колькасці дзяцей, аздароўленых у кругласутачных лагерах. Плануем, што ў бягучым годзе гэта лічба павялічыцца прыкладна на 10 тыс. дзяцей", - расказаў Генадзь Балбатоўскі.

Паводле яго слоў, падрыхтоўчыя работы па ўмацаванні матэрыяльна-тэхнічнай базы для гэтага ўжо выкананы. На падрыхтоўку лагераў да летняй аздараўленчай кампаніі зрасходавана больш за Br30 млн.

Што датычыцца дзяржаўных датацый на дзіцячы адпачынак, то ў гэтым годзе такія датацыі могуць атрымліваць і непрацуючыя бацькі. "Для гэтага яны павінны звяртацца да спецыялістаў Рэспубліканскага цэнтра па аздараўленні і санаторна-курортным лячэнні. У кожным рэгіёне краіны яны ёсць, інфармацыя аб месцы і часе іх знаходжання ёсць на сайце нашага цэнтра. Што датычыцца працуючых бацькоў, то яны павінны звяртацца з заявай у камісію па аздараўленні па месцы работы. Датацыя ў так званыя прыватныя лагеры, якія працуюць па ўласнай ініцыятыве, не выдзяляецца", - праінфармаваў кіраўнік цэнтра.

Генадзь Балбатоўскі адзначыў, што ў пазамінулым годзе паказчык ахопу дзяцей аздараўленнем упершыню перасягнуў рэкордныя 40 працэнтаў. "У мінулым годзе было больш за 42 працэнты ад колькасці дзіцячага насельніцтва. Калі гаварыць у абсалютных лічбах, то гэта больш за 372 тыс. дзяцей. У бягучым годзе мы плануем аздаравіць ужо не менш як 393 тыс., але, як правіла, мы перавыконваем гэтыя планы, таму што пастаянна з'яўляюцца жадаючыя, і я думаю, што ў гэтым годзе мы наблізімся ўжо да 400 тыс. дзяцей", - упэўнены дырэктар.-0-
Падпісвайцеся на нас у
Twitter
Топ-навіны
Свежыя навіны Беларусі