28 студзеня, Мінск /Кар. БЕЛТА/. Змяненні ў заканадаўства, звязаныя з унутрыпалітычнай сітуацыяй у краіне, будуць падрыхтаваны і ўнесены ў бліжэйшы час. Аб гэтым паведаміў журналістам намеснік дзяржаўнага сакратара Савета бяспекі Аляксандр Рахманаў па выніках нарады ў Прэзідэнта, перадае карэспандэнт БЕЛТА.
Паводле яго слоў, удзельнікі нарады ў кіраўніка дзяржавы разгледзелі шырокае кола пытанняў аб удасканаленні нацыянальнага заканадаўства і магчымасці яго актуалізацыі на перспектыву, каб "яно своечасова і аператыўна рэагавала на любыя выклікі і пагрозы, напрыклад такія, з якімі сутыкнулася наша краіна ў другім паўгоддзі 2020 года".
У ліку такіх выклікаў і пагроз ён назваў, у прыватнасці, масавыя мерапрыемствы, якія перарасталі ў непадпарадкаванне, супраціўленне супрацоўнікам праваахоўнай сферы. Да такіх мерапрыемстваў прыцягваліся непаўналетнія. Былі выпадкі блакіравання транспартных камунікацый, заклікі да правядзення забастовак у розных арганізацыях, прадпрыемствах, установах, паўсюднае распаўсюджванне незарэгістраванай сімволікі, збор і распаўсюджванне персанальных даных аб асобе, прычым не толькі аб дзяржаўных служачых, але і іншых людзях, якія займаюць актыўную грамадзянскую пазіцыю. Гэтыя даныя перадаваліся і выкарыстоўваліся іншымі людзьмі для зняваг і пагроз. "Зразумела, усё гэта недапушчальна, - канстатаваў намеснік дзяржсакратара. - У адпаведнасці з канцэпцыяй нацыянальнай бяспекі неэфектыўнасць, недасканаласць дзеючага заканадаўства, яго няздольнасць своечасова і актуальна адрэагаваць на ўзнікаючыя рызыкі, выклікі і пагрозы недапушчальна".
На яго думку, каб у далейшым не дапусціць падобнага, неабходна ўнесці адпаведныя змяненні ў адміністрацыйнае, крымінальнае, крымінальна-працэсуальнае і выбарчае заканадаўства.
Аляксандр Рахманаў падкрэсліў, што прапановы аб змяненні заканадаўства будуць падрыхтаваны неадкладна і прыняты ў хуткім часе. Для гэтай работы кіраўнік дзяржавы вызначыў мінімальныя тэрміны. "На працягу першага квартала 2021 года неабходныя змяненні ў наша нацыянальнае заканадаўства будуць унесены", - сказаў ён.
Як стала вядома па выніках нарады, змяненні будуць унесены, у прыватнасці, у Крымінальны кодэкс і Працоўны кодэкс - з тым, каб спыніць заклікі да забастовак. Чакаецца рэвізія закона аб экстрэмізме, прыняцце закона аб недапушчэнні гераізацыі нацызму, узмацненне аховы персанальных даных, а таксама абароны ад агрэсіўных выпадаў у адрас суддзяў, праваахоўнікаў, журналістаў, іншых сацыяльных груп.-0-
