У беларускім заканадаўстве плануюць замацаваць паняцце чаявых

1 сакавіка, Мінск /Кар. БЕЛТА/. У беларускім заканадаўстве плануюць замацаваць паняцце чаявых і вызначыць, каму яны належаць. Аб гэтым паведаміў начальнік галоўнага ўпраўлення падаткаабкладання фізічных асоб Міністэрства па падатках і зборах Андрэй Кавалеўскі, перадае карэспандэнт БЕЛТА.

"У Беларусі ў заканадаўстве тэрмін "чаявыя" не замацаваны. Падатковая служба ў гэтым выпадку не зусім вітае азначэнне "дарэнне", паколькі дарэнне прадугледжвае бязвыплатнасць. А калі вы прыйшлі ў кафэ, вас абслужылі, вам спадабалася кухня і абслугоўванне, вы пакінулі чаявыя - тут бязвыплатнасць не прадугледжваецца. Гэта ваша дадатковая плата. Але паколькі тэрмін "чаявыя" афіцыйна не замацаваны, гэтыя пытанні перыядычна ўзнікаюць. Ведаю, што дзяржорганы цяпер працуюць над пытаннем замацавання тэрміна "чаявыя", і гэта сапраўды вельмі трэба і важна", - сказаў Андрэй Кавалеўскі.

Ён таксама адзначыў, што важна вызначыць, каму належаць чаявыя. "Вы ж пакідаеце іх ва ўстанове, дзе ёсць наёмныя работнікі - афіцыянты, повары. Узнікае пытанне: гэтыя грошы належаць юрыдычнай асобе - уладальніку гэтай установы або афіцыянту? Гэта патрабуе вызначэння. Пытанне прапрацоўваецца", - дадаў прадстаўнік МПЗ.-0-