ДЗЯРЖОРГАНЫДЗЯРЖОРГАНЫ
Флаг Аўторак, 27 ліпеня 2021
Мінск Пераменная воблачнасць +22°C
Усе навіны
Усе навіны
Грамадства
20 красавіка 2016, 17:10

У Беларусі вызначаны парадак прыёму на альтэрнатыўную службу і ўмовы яе праходжання

20 красавіка, Мінск /Кар. БЕЛТА/. У Беларусі вызначаны парадак прыёму на альтэрнатыўную службу і ўмовы яе праходжання. Адпаведнае рашэнне змешчана ў пастанове Савета Міністраў ад 18 красавіка 2016 года нумар 312, паведамілі БЕЛТА ў прэс-службе ўрада.

Дакумент прыняты ў мэтах прывядзення нарматыўнай прававой базы ў адпаведнасць з законам "Аб альтэрнатыўнай службе" ад 4 чэрвеня 2015 года.

Праходзячы альтэрнатыўную службу, грамадзяне будуць выконваць работы ў арганізацыях аховы здароўя, жыллёва-камунальнай, лясной і сельскай гаспадаркі, сацыяльнай сферы, арганізацыях, якія займаюцца добраўпарадкаваннем тэрыторый. Яны таксама будуць прыцягвацца да рамонту чыгуначных пуцей і аўтадарог.

Час праходжання грамадзянамі альтэрнатыўнай службы залічваецца ў стаж работы.

Прадугледжана, што Міністэрства працы і сацыяльнай абароны ўстанаўлівае пералік арганізацый, у якіх грамадзяне праходзяць альтэрнатыўную службу, а таксама формы прадпісання для праходжання альтэрнатыўнай службы, пасведчанні і форму ўліковай карткі грамадзяніна, які праходзіць такую службу.

Пастанова таксама замацоўвае парадак і ўмовы прадастаўлення грамадзянам, звольненым з альтэрнатыўнай службы, першага рабочага месца.

Акрамя таго, вызначаны парадак правядзення ваенна-ўрачэбнай экспертызы. Правамоцтвы праводзіць яе для вызначэння катэгорыі годнасці грамадзян прадастаўлены ваенна-ўрачэбным камісіям.

Вызначаны агульныя палажэнні арганізацыі і правядзення медыцынскага агляду грамадзян, якія праходзяць альтэрнатыўную службу. Устаноўлена, што такі агляд праводзіцца па накіраванні органа па працы, занятасці і сацыяльнай абароне па месцы знаходжання арганізацыі, у якой грамадзянін будзе служыць.

Парадак накіравання на медыцынскі агляд, формы дакументаў, неабходных для накіравання, і парадак іх афармлення ўстанаўліваюцца Мінпрацы і сацабароны сумесна з Міністэрствам аховы здароўя па ўзгадненні з Мінабароны.

Арганізацыя правядзення медыцынскага агляду грамадзян ускладаецца на ваеннага камісара (кіраўніка адасобленага падраздзялення ваеннага камісарыята) раёна (горада) па месцы праходжання грамадзянінам службы. Медыцынскі агляд праводзяць урачы-спецыялісты, уключаныя ў склад урачэбных камісій з правамі ваенна-ўрачэбных камісій ваенных камісарыятаў (адасобленых падраздзяленняў ваенных камісарыятаў) раёнаў (гарадоў): урач-хірург, урач-тэрапеўт, урач-неўролаг, урач-афтальмолаг, урач-отарыналарынголаг і пры неабходнасці - урачы іншых спецыяльнасцей.

Для ўдакладнення дыягназу грамадзянін, які праходзіць альтэрнатыўную службу, можа быць накіраваны ў дзяржаўную арганізацыю аховы здароўя на медыцынскае абследаванне ў амбулаторных або стацыянарных умовах. Пры гэтым патрабаванні да стану здароўя аналагічныя патрабаванням, што прад'яўляюцца ў адносінах да грамадзян, якія праходзяць тэрміновую ваенную службу і службу ў рэзерве.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі