17 красавіка, Мінск /Кар. БЕЛТА/. У Беларусі выбіраюць аптымальны шлях для паляпшэння сістэмы бяспекі ў школах, аналізуючы пры гэтым замежны вопыт. Аб гэтым паведаміў карэспандэнту БЕЛТА міністр адукацыі Ігар Карпенка.
Тэма гарантавання бяспекі ва ўстановах адукацыі актуальная ў розных краінах свету. Беларусь не выключэнне. Ігар Карпенка нагадаў, што да гэтага часу спецыялісты Мінадукацыі прааналізавалі дзейнасць сацыяльна-псіхалагічных службаў устаноў адукацыі, прымяненне нарматыўнай базы па арганізацыі прапускнога рэжыму, гарантаванні бяспекі і гэтак далей.
"Пытанне абмяркоўваецца. Будзем выбіраць аптымальна прымальнае рашэнне, якое дасць магчымасць зрабіць школу бяспечнай творчай пляцоўкай, сацыякультурным цэнтрам, які будзе адкрыты і для бацькоў, і для навучэнцаў, і для грамадскасці", - падкрэсліў міністр.
Ён звярнуў увагу, што гаварыць аб увядзенні ва ўстановах адукацыі штату ахоўнікаў і пасады намесніка дырэктара па бяспецы заўчасна. Аб тым, што такая магчымасць толькі прапрацоўваецца, ішла размова і на круглым стале "Стварэнне бяспечных умоў пры арганізацыі адукацыйнага працэсу" ў прэс-цэнтры БЕЛТА. "Гэта ўсяго толькі абмеркаванне. Не факт, што так будзе. Але разам з тым мы вывучалі, напрыклад, вопыт Расіі, знаёміліся з тым, як арганізавана сістэма бяспекі ва ўстановах адукацыі Турцыі", - расказаў міністр.-0-
