16 снежня, Мінск /Кар. БЕЛТА/. У Беларусі пахаладае ў пачатку наступнага тыдня, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"У паўночных шыротах атлантычныя цыклоны бесперапынным ланцужком перамяшчаюцца на ўсход і арктычнае паветра ніяк не можа прарвацца на поўдзень кантынента. У большасці дзяржаў Еўропы ўстанавілася не па сезоне цёплае надвор'е. Сёння напор цяпла ўзмоцніцца. У Беларусі чакаецца 1-6 градусаў вышэй за нуль. У многіх раёнах пройдуць невялікія дажджы. Месцамі будуць клубіцца туманы. Вецер прагназуецца паўднёва-заходні, заходні ўмераны. Не зменіцца сітуацыя ў пятніцу і ў бліжэйшыя выхадныя. Па-ранейшаму захаваецца павышаны тэмпературны рэжым, практычна паўсюдна снег растане", - расказалі ў Белгідрамеце.
У пятніцу, 17 снежня, умовы надвор'я ў краіне будзе вызначаць няўстойлівая паветраная маса, якая паступае з Фінскага заліва. Будзе воблачна з праясненнямі. У многіх раёнах пройдуць невялікія ападкі (дождж, мокры снег). Месцамі чакаюцца слабыя туман і галалёд. На асобных участках дарог магчыма галалёдзіца. Вецер прагназуецца паўночна-заходні, паўночны ўмераны. Тэмпература паветра на працягу сутак складзе ад мінус 1 да плюс 5 градусаў.
У суботу, 18 снежня, ноччу надвор'е будуць фарміраваць няўстойлівыя паветраныя масы, раніцай і днём чакаецца перамяшчэнне атмасфернага фронту з Балтыйскага мора. Будзе воблачна з праясненнямі. Ноччу месцамі, раніцай і днём на большай частцы тэрыторыі краіны пройдуць кароткачасовыя ападкі (снег, мокры снег, днём з дажджом). У асобных раёнах чакаецца слабы галалёд, на дарогах галалёдзіца. Вецер прагназуецца паўночны, днём з пераходам на заходні ўмераны, месцамі парывісты. Тэмпература паветра ноччу складзе ад мінус 4 да плюс 1, днём - ад мінус 2 да плюс 4 градусаў.
У нядзелю, 19 снежня, надвор'е будуць фарміраваць франтальныя раздзелы, звязаныя з чарговым атлантычным цыклонам, які перамяшчаецца праз Скандынаўскі паўвостраў на паўночны захад еўрапейскай Расіі. У Беларусі будзе пераважаць пахмурнае надвор'е. Пройдуць ападкі (мокры снег, дождж). Ноччу і раніцай у асобных раёнах чакаецца слабы галалёд, на дарогах галалёдзіца. Вецер прагназуецца паўночна-заходні, заходні парывісты, раніцай і днём месцамі па паўднёвым захадзе краіны моцны парывісты. Тэмпература паветра ноччу складзе ад мінус 3 да плюс 3, днём - ад мінус 2 да плюс 4 градусаў.
"У пачатку наступнага тыдня сітуацыя ў атмасферы пачне змяняцца. Глыбокі і шырокі цыклон, перамясціўшыся на ўсход ад Масквы, пачне разгортваць паветраныя патокі. І замест атлантычнага цяпла ў краіну ўжо будзе паступаць арктычнае паветра з боку Баранцавага мора", - адзначылі ў Белгідрамеце.
У панядзелак, 20 снежня, пачнецца пахаладанне. Часам будзе ісці невялікі снег. На асобных участках дарог чакаецца галалёдзіца. Вецер прагназуецца паўночны ўмераны. Тэмпература паветра на працягу сутак складзе ад нуля па паўднёвым захадзе да мінус 10 па паўночным усходзе краіны.
З аўторка, 21 снежня, чакаецца халоднае надвор'е. На большай частцы тэрыторыі Беларусі пройдзе невялікі снег, у многіх раёнах утворыцца снежнае покрыва. Асобныя ўчасткі дарог будуць слізкімі. Вецер прагназуецца паўночны ўмераны. Тэмпература паветра ноччу складзе 7-14 градусаў марозу, пры праясненнях - мінус 15-20. Днём будзе 5-12 градусаў ніжэй за нуль.
У сераду, 22 снежня, будзе воблачна з праясненнямі. Пераважна па паўднёвым захадзе краіны пройдзе снег. На асобных участках дарог чакаецца галалёдзіца. Тэмпература паветра ноччу складзе 7-14 градусаў марозу, пры праясненнях - мінус 15-20, днём - 5-12 градусаў ніжэй за нуль. У паўднёва-заходніх раёнах на працягу сутак будзе мінус 3-6.-0-
