26 сакавіка, Мінск /Кар. БЕЛТА/. У Беларусі да канца тыдня зноў пахаладае, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Бязвоблачнае ціхае надвор'е фарміруе антыцыклон з цэнтрам над краінай. Мінулыя дні характэрнай асаблівасцю надвор'я былі вялікія амплітуды паміж начнымі і дзённымі тэмпературамі. Так, 25 сакавіка ў сталіцы мінімальная тэмпература была 8 градусаў марозу, а ў разгар дня паветра прагрэлася да 9 градусаў цяпла. Па меры перамяшчэння антыцыклону на ўсход Беларусь апынецца на яго заходняй, больш цёплай ускраіне, і маразы стануць слабейшыя, дні цяплейшыя, пры гэтым з'явяцца хмары. Таму ў пятніцу, 27 сакавіка, чакаецца пераменная воблачнасць, без ападкаў. Вецер усходні ўначы слабы, удзень - умераны. Тэмпература паветра ўначы будзе вагацца ад нуля да мінус 6 градусаў, месцамі да мінус 8. Дзённая тэмпература будзе плюс 10-16 градусаў.
У суботу, 28 сакавіка, надвор'е ў Беларусі прадоўжыць фарміраваць вобласць павышанага атмасфернага ціску. Чакаецца пераменная воблачнасць, без ападкаў. Вецер будзе ўсходні, паўднёва-ўсходні ўмераны. Тэмпература паветра ўначы будзе мінус 3 - плюс 4 градусы. Удзень паветра прагрэецца да 11-17 градусаў.
З нядзелі, 29 сакавіка, надвор'е пачне змяняцца. Атмасферны ціск стане падаць, уладу над надвор'ем у дзённы час возьме атмасферны фронт. Павялічыцца воблачнасць. Уначы яшчэ будзе без ападкаў, а ўдзень на большай частцы тэрыторыі краіны пройдуць кароткачасовыя ападкі ў выглядзе дажджу, які пераходзіць у мокры снег. Ноччу і раніцай дзе-нідзе чакаецца слабы туман. Паўднёва-ўсходні вецер зменіцца на паўночна-заходні, ноччу ўмераны, а ўдзень парывісты. Уначы тэмпература паветра ад нуля да плюс 5 градусаў. Днём - ад 3 градусаў цяпла па паўночным захадзе да плюс 16 па паўднёвым усходзе краіны.
У пачатку наступнага тыдня ўмовы надвор'я будзе вызначаць няўстойлівая халодная паветраная маса, якая пачне паступаць з паўночнага захаду Еўропы. Уначы тэмпература паветра чакаецца мінус 5 - плюс 2 градусы, удзень ад нуля да 7 градусаў цяпла. Адчуванне холаду ўзмоцніць парывісты паўночны вецер. Месцамі пройдуць кароткачасовыя ападкі ў асноўным у выглядзе мокрага снегу, у асобных раёнах зноў зямлю прыцярушыць снегам, на асобных участках дарог магчыма галалёдзіца.-0-
