20 лістапада, Мінск /Кар. БЕЛТА/. У Беларусі прапануецца ўвесці новыя льготы для таленавітай моладзі пры паступленні ў ВНУ. Аб гэтым паведаміла журналістам начальнік упраўлення прафесійна-тэхнічнай і сярэдняй спецыяльнай адукацыі Міністэрства адукацыі Аляксандра Пятрова, перадае карэспандэнт БЕЛТА.
"У правілы паступлення ва ўстановы адукацыі плануецца ўнесці пункт аб унутрывузаўскіх алімпіядах, пераможцы якіх будуць на льготных умовах паступаць ва ўстановы вышэйшай адукацыі", - адзначыла Аляксандра Пятрова.
Яна нагадала, што юнакі і дзяўчаты з банка адоранай моладзі маюць права на пазачарговае атрыманне жылога памяшкання ў інтэрнаце ў перыяд навучання, першачарговае размеркаванне пасля заканчэння ВНУ. А калі такі выпускнік становіцца маладым спецыялістам, ён мае права на надбаўку да тарыфнай стаўкі і акладу. Таксама ёсць права на атрыманне льготнага крэдыту на будаўніцтва, рэканструкцыю або набыццё жылога памяшкання.
"Нягледзячы на тое, што сістэма адукацыі накіравана ў першую чаргу на атрыманне прафесіі, ва ўстановах адукацыі таксама наладжана работа па пазаўрочнай дзейнасці. І тут вялікую ролю адыгрываюць аб'яднанні па інтарэсах. Працуюць навукова-даследчыя таварыствы. Развіццю патэнцыялу моладзі садзейнічае ўдзел у конкурсах прафесійнага майстэрства", - расказала Аляксандра Пятрова.
Каб моладзь не проста рэалізоўвала свой творчы патэнцыял, але і магла прымяніць яго ў далейшым, пабудаваць на гэтым сваю будучую кар'еру, штогод Міністэрства адукацыі праводзіць конкурс на атрыманне гранта для выканання навукова-даследчых работ. "Такая падтрымка накіравана на стварэнне дадатковых умоў для стымулявання таленавітых вучоных. Ну і, вядома, важным элементам сістэмы падтрымкі з'яўляецца спецыяльны фонд Прэзідэнта па сацыяльнай падтрымцы адораных навучэнцаў і студэнтаў", - падкрэсліла яна.
Паводле яе слоў, ужо амаль 40 тыс. навучэнцаў і студэнтаў, а таксама каля 4 тыс. педагагічных і навуковых работнікаў заахвочаны з гэтага фонду. Адораным студэнтам таксама назначаюцца стыпендыі Прэзідэнта Беларусі.
Дзяржава аказвае падтрымку і таленавітым школьнікам. "У сістэме агульнай сярэдняй адукацыі створаны ўмовы для паўнацэннага развіцця ўсіх вучняў, забяспечана магчымасць не толькі вучыцца, але і развіваць свае здольнасці. Уся сістэма конкурсаў, якая існуе на школьным узроўні, дазваляе заўважыць асаблівасць, гатоўнасць да работы, зацікаўленасць у вывучэнні таго ці іншага прадмета", - дадала галоўны спецыяліст упраўлення агульнай сярэдняй адукацыі Мінадукацыі Наталля Іванова.-0-
